港股上周五表現牛皮，繼續守喺10日線之上，但睇番內地股市走勢唔錯，美股道指又突破3年高位，港股短線走強機會似乎幾大。
滙豐控股（005）將於今日收市後公佈業績，觀乎之前公佈裁員數目少過原定水平，有人工加、有花紅出，仲要被炒員工一樣可以收花紅，難得咁闊佬，可能預示業績理想，投機性小注Call滙控（005）可能有着數，但記住係Allornothing嘅賭博，雞仔注就好。
個股方面，儀征化纖（1033）主要生產聚酯產品，PTA產量全球第六大。2010年前，內地聚酯行業持續供過於求，但經過一輪汰弱留強，競爭力差嘅企業被淘汰之後，供求情況開始改善。作為行業龍頭之一，儀征業績長期不景嘅情況，喺2010年亦開始逐漸改善。
舊年首3季，儀征每股盈利0.214元（人民幣．下同），但第4季開始反映歐債危機對產品需求嘅影響，相信業績麻麻。展望未來，如果市場需求恢復，PTA價格回升至每噸1萬元，同時油價唔係升得太過份，或者PTA漲價可以抵銷油價升幅，咁儀征盈利就有望重返歐債危機前水平，市盈率可降至6至7倍，甚至更低。
見倒轉錘頭多大升
儀征股價向來比較跟貼PTA價格，舊年PTA每噸最高曾升破1萬元，10月至11月跌至約8000元水平，現價約9000元。儀征股價短線能否突破，多少要睇PTA價格走勢，睇番近排油價係咁升，化纖產品生產成本基本上同油價掛鈎，隨時帶動PTA價格重拾升軌，儀征股價都有機會受惠。
今年年初到2月中，PTA價格一直上漲，及至2月中開始出現整固，不過，儀征股價相對上明顯強一啲，上星期一跟隨中石化（386）插咗一吓之後，股價繼續穩步上揚，走勢唔錯。
睇番儀征過往嘅技術走勢，如果單睇舊年10月到家嘅日線圖，就會發現每逢喺短線升浪當中出現陽燭倒轉錘頭形態嘅話，之後嗰日股價都能夠大升，暫時三射三中，未Miss過。上星期五儀征股價就出現咗倒轉錘頭，如果今日有靚位就可以上車，博兩三日有一成以上回報。
晉佳
本欄逢周一、三及五刊出