金剛最近主持節目《五覺大戰》，有指他以工作之便力追「神獸天使」蔡慧欣。前晚二人同場錄影，再加上曾與蔡慧欣傳緋聞的羅仲謙，兩男一女「嬲爆爆」合照，金剛明言冧蔡慧欣，但對方竟然請他食檸檬，認真！
無綫遊戲節目《五覺大戰》三位主持人錢嘉樂、洪天明和金剛認真喜事重重，繼洪天明宣佈321結婚後，嘉樂前晚又透露有意與秘密拍拖四年的湯盈盈在一、二年內拉埋天窗，連剛甩拖的金剛亦有新目標，睇中落選港姐蔡慧欣。
三人合照勁尷尬
羅仲謙、周秀娜、杜汶澤及江若琳等前晚任節目嘉賓，羅仲謙曾與蔡慧欣傳緋聞，金剛甫見「情敵」羅仲謙即攬頭攬頸，反而蔡慧欣十分避忌，三人合照時顯得好尷尬。金剛被問是否追求蔡慧欣，他笑說：「有啲咁嘅事……覺得佢幾可愛，識多啲朋友冇問題，但之前同前女友發展太快未深入了解，今次要慢慢嚟，順其自然啦！」蔡慧欣在賽車飄移環節「飛奶」走光，問金剛會否心痛，他說：「佢有打底，性感好事，唔係節目邊有28點。」
嘉樂承諾娶盈盈
蔡慧欣被問會揀邊個？她說：「我真係唔知呀！」但她即場請金剛食檸檬說：「唔係識咗好耐，答唔到，但唔會畀負面新聞嚇怕，做住朋友先。」金剛被指爛滾兼唱衰舊女友，同場嘉賓周秀娜表示金剛無追她，笑他眼光有問題。
另外，錢嘉樂亦承諾會娶盈盈，他說：「最遲後年，但唔會大搞。」有指二人早前去新加坡預支蜜月兼豪使10萬，他說：「冇咁多，但使得開心。」
採訪：譚倩宜
攝影：陳志嵐
