中環在線:豬肉股普甜 要求「齋戒沐浴」 - 李華華

中環在線:豬肉股普甜 要求「齋戒沐浴」 - 李華華

舊年食品股真係輸到華華啲芬佬朋友走夾唔抖,無他嘅,好似雨潤(1068)、蒙牛(2319)咁,一話有咩食品安全問題,閒閒哋就同你跌幾成,早排個市咁難炒,輸一隻咁甘,好難追得番㗎陰公!所以話,做食品股你同我講咩鴻圖大計都係假,搞掂啲安全問題先好同投資者講嘢啦!
近排有隻來自福建嘅豬肉股中國普甜(1699)打算嚟上市。噚日華華有機會見到普甜嘅老總蔡晨陽,第一時間就問吓點解決食品安全問題,蔡總快人快語話好歡迎華華隨時上去睇場,但有一個條件,就係要「齋戒沐浴」兩日先!吓?唔通豬場殺生得多,連參觀都零舍多規矩?非也!原來所謂「齋戒沐浴」,係要華華兩日唔准食任何肉類,等身體嘅細菌毒素通通清晒後,先入去豬場參觀,避免有病毒交叉感染,萬一有咩豬流感咪大鑊!蔡總仲話,員工都係每半個月先准出豬場一次,每次返入去都要遵守隔離兩日規條,所以豬場由05年成立至今,無出現過豬瘟喎!