強國除咗喺經濟規模位列三甲，原來「僭建」都儕身三強，《紐約時報》早前報道，繼美國同巴西後，中國已成為全球第三整容大國，古語有云「女為悅己者容」，貪靚嘅強國人都希望來個大變臉。2010年中國整容市場產值達3000億元人仔，從業員超過2000萬人，行業平均以超過四成嘅速度增長。
強國整容業興起近10年，越嚟越蓬勃，但強國整容機構嘅水平參差不齊，風險高亦為人所詬病，有內地傳媒引用消費者協會嘅統計，歷年美容等領域嘅投訴不斷，每年平均有超過兩萬宗毀容嘅投訴，粗略估計10年內有近20萬塊臉被毀。信唔過自己人，鄰近嘅韓國最受惠，根據韓國駐華使館數據，舊年為咗去南韓整容嘅中國遊客發放咗成1073份簽證，較2010年上升咗3.86倍咁多㗎！