細說德國歷史，談平治、論足球，你我皆知。但講到德國音響領域，你又認識幾多？新一代「年輕」土炮GermanPhysiks，為慶祝誕生25周年，推出由調音大師Brinkmann親自監督嘅頂級黑膠系統，最難忘莫過於第一次以膽機供電，唔單止人聲甜暖，仲有一份親臨現場表演嘅「空氣感」。
記者：陳國輝
攝影：黃子偉
Model：Jancy@Zmodel
Brinkmann親自調聲
未聞其聲，先見傳統黑膠唱盤外觀，似乎有點平凡。原來珍貴之處，除咗全球限量25部，還在於每一部都由調音大師Brinkmann親自操刀，以確保有最佳質素；至於呢次25周年版本，Brinkmann更於12吋唱臂以下位置，特製咗一個用花梨木製成嘅子環，睇落唔止搶眼，仲藉此鎖緊唱臂，令音色保持高穩定水準。
好多發燒級黑膠唱盤都採用亞加力物料，優點係輕，仲可減低轉盤造成嘅微弱嘈音。不過始終由摩打推動轉盤，仍未能圓滿解決諧震嘅問題。Brinkmann採用美國HRS承板底盤，結合埋轉盤、特製支架，外層為鋁合金，並加上其他物料擠壓而成，好處係密度極高，除咗防漏聲，還提供避震功能，因此能有效減低諧震。
帶動設計 保持均速
講到減震，又點少得呢部黑膠系統嘅帶動式設計。與傳統摩打轉盤相比，Brinkmann具備一個用帶來推動嘅轉軸，並長期浸喺保持在攝氏21度嘅油入面，特點係唔似其他黑膠唱盤咁，需時15至20秒WarmUp，佢喺任何時間都能以均速轉動，就算經常換碟、跳播，絲毫唔影響音色。
聽黑膠，多數人以為佢只求人聲，不重細節，其實不然！頂級唱盤特別係Brinkmann，除咗重視背樂細緻度，佢更係第一部用膽機供電嘅黑膠系統，而並非傳統嘅原子粒機。呢款外置式膽機由五支真空管組成，包括一支6111WA、兩支6BW4以及兩支EC360；音色表現上，特別人聲，佢唔止比一般黑膠有更甜暖嘅感覺，就如音響專家DavidLee形容，佢有一種如親臨聽眾面前演唱嘅「空氣感」，當然唔少得嘅，仲有50至60年代嗰種韻味。
配置：12.1吋唱臂、唱頭、外置電源、轉軸衡溫器、HRS承板
$480,000
查詢：音響店（23690998）