中國製藥（1093）仲喺金融海嘯價位載浮載沉，勝在夠平，睇啱就嚟。中國製藥2011年半年度（6月底）純利跌咗38%到兩億銀，業績雖則唔多靚仔，但股價亦同步反映，由一年前5蚊邊位，大跌近60%，到落家陣2.14元，已經同09年金融海嘯後期嘅起步位相差無幾。而呢期資金搵嘢炒，藥業股未點郁過，可能係其中一個選擇。再講，中國製藥呢個低殘價，NAV折讓高達43%，夠晒墊底。又啱上年年尾，祖國報章話，維生素產品已經有止跌回穩迹象，加埋阿爺講明「十二．五」將繼續擴大基本醫保覆蓋面，中國製藥業績回暖唔難。中國製藥啱兜咗個圓底，博上量度目標2.6元，現價潛在回報率22%，集團未有耐上到NAV。
中航現金牛炒業績
中航工業（232）呢期又係股價未大幅爆上，成交先行嘅異動格局，可昅昅。中航去年6月揸住淨現金兩億銀，集團本身價殘，加埋現金牛，加強防風力。而中航前排又發咗2011年度盈喜，集團嚟緊日子，一落實公佈業績日期，亦提供炒業績嘅誘因。呢轉短打，博中航升20%到0.36元，集團亦未有耐上到NAV0.56元水位。
錢雋