個市相當悶，但股仔百花齊放，長興（238）、霸王（1338）等半新股爆升逾1成，總之只要距離250日線遠嘅股份，都有熱錢流入，相信短期內以此方式尋寶，應該仲搵到食。
本欄2月9日首次推介億和控股（838），指其谷底反彈，升浪可望持續，結果即日爆升9%，收報1.55元，隨後高見1.62元後掉頭。經兩周整固後，上周五早市突現25球大手上板，作價1.50元，其後升勢一發不可收拾，最高炒至1.65元，升破上一浪高位；收報1.59元，漲5.3%，成交較上日激增10倍至6420萬股。據成交及盤路推斷，魏力相信是基金大手補貨所致，並非一日可完成，短期再爆發大升浪，機會高唱入雲！
億和主營金屬及塑膠部件生產，客戶粒粒皆星，包括東芝、Canon、Ricoh、Xerox及Epson等等，本來係基金愛股，但去年3月日本大地震後，唔少工廠停工，令億和買唔到零件，焗住要減少接單，令股價由高位計蒸發三分之二。
不過，事過境遷，日本工廠陸續復產，億和定單可望恢復正常，如重返2010年盈利水平，現價PE僅8倍，相當吸引。現價買入，短線睇1.90元，中線可挑戰250日線2.40元，水位51%！
魏力