今日係奧斯卡頒獎禮大日子，可惜今年好戲眾多，講述華爾街大鱷的寫實製作《孖展風雲》只得原創劇本提名。然而，同樣講股市大鱷的港產片《竊聽風雲2》不但賣座，喺香港電影金像獎就包攬9項提名，隨時成大贏家。有Banker八畀我哋知，早前去戲院睇《竊聽2》，竟然巧遇城中大孖沙真人Show。
劇情略浮誇 勝在通俗
《無間道》金牌班底麥兆輝、莊文強編導的《竊聽2》，故事圍繞本地大孖沙組成的地主會，平時會相聚玩紙牌鬥地主，兼會喺股票市場拍檔搵真銀。戲中由曾江飾演的「同叔」，即係地主會老大，與老戲骨江毅、胡楓、郭峰和駱應鈞等成員幾十年前造市。但事件敗露後，曾江強迫胡楓飾演的金牌經紀一力承擔罪名，胡楓之子吳彥祖長大後，策劃為老父報仇。雖然《竊聽2》劇情略嫌浮誇，關於股票買賣的情節也有唔少穿崩位，但也不失為香港少數描寫大孖沙的通俗作品，可以畀80後了解股壇大鱷鮮為人知的一面。
心底感受 佢自己先知
話說，當日Banker入場坐定定睇戲，見兩名大漢與一位老人家施施然入場，坐喺Banker隔離。Banker好奇一望之下，赫然發現這位老人家，就係城中地位昭然的股壇大孖沙，兩名大漢原來係陪睇戲的保鑣。不過，這位大孖沙冇睇晒成場戲，中途就起身面黑黑走人。
須知道《竊聽2》後段，「同叔」與地主會成員反目，更加中咗吳彥祖圈套，與世姪玉石俱焚。大孖沙睇在眼裏，心底感受如何，得佢自己先知。
我哋又聽講，大孖沙同幾位富豪當時本來相約好去地中海坐豪華遊艇嘆世界，但計劃突然作罷，唔知係咪與佢睇完《竊聽2》，心情不暢快有關。
選委的ConvictionBuy
豬狼競爭白熱化，弄得建制派大分裂，兩個陣營已勢成水火，他日邊一方的陣營上場，另一方的支持者雖不至於被秋後算賬，也肯定會被「銘記於心」，因此選委對於是否給予提名，箇中肯定不能沒有這種押錯邊的焦慮，即係究竟係提名給自己屬意、理念最一致的人選，還是提名給最有勝算的人選。
事實上，若果選委的心水，並非最有勝算的人，則最保險的博弈之道，是明哲保身，不作任何提名，但在投票時仍投給自己屬意的心水，因為後者是不記名的，即使自己支持的一位輸掉，也難以被勝出者事後抽秤。
所以當我哋睇到梁振英的提名名單，竟然較預期為多，而且取得不少專業人士的提名，還是感到有點詫異，原來上述的「西瓜開大邊」定律，並非對所有人都適用。
下任證監主席大熱 撐振英
其中一例，便是剛於去年退下畢馬威亞太及中國區主席的唐家成，一向公職多多的Carlson，2006年至2008年出任上市委員會主席，目前是證監會非執行董事，及行政總裁遴選委員會的成員，更被盛傳是下屆證監會主席的「大熱」人選。
照計上位行情看漲，在這個提名形同埋堆的小圈子選舉中，更加要小心翼翼，不做出頭鳥，不會影響仕途，但埋錯堆卻幾可肯定會行人止步。再者，唐營的支持者幾乎囊括了工商巨賈，當中肯定不少是昔日的大客。
我哋覺得Carlson的取態ReallyMeansSomething，絕非單純自身利益的計算。我哋收到風，話Carlson老早便向友人表示，香港確實存在不少深層次矛盾，真的DueForChange，係到了變革的時候。我哋覺得，提名對佢嚟講，係ConvictionBuy（確信買入），係PutYourMoneyWhereYourMouthIs，沒有取巧，值得Salute。
唐感情缺失 婦女精英說不
我哋仲八到，雖然CY同唐唐同樣身陷誠信危機，但唐唐因為衰多瓣感情缺失，而且仲兩度要老婆出嚟頂，得失咗唔少婦女精英，所以會計界仍未有提名的24個選委，不止一名女選委私下表示，日後投票企硬不會投俾唐唐。
其實唔止婦女票流失咗，向來高舉家庭價值嘅宗教界別及教育界別，都有唔少選委擔心投俾唐唐會俾人詬病，所以唐唐要箍佢哋啲票，都幾有難度。