上星期五唔少盈警股爆升，好似霸王（1338）同敦沛（812）咁，隻隻升幅都一成過外，仲要有成交配合，冇花冇假，證明個市資金氾濫，一見股價落後就砌上去。根據呢個Pattern，主打健康產品嘅豪特保健（OTO，6880）值得望多幾眼。
呢隻由女神陳法拉代言嘅半新股，舊年12月上市，當時挾超購240倍嘅威勢閃耀登場，但頭兩日最多高招股價6.3%咁大把，之後就因為業績走樣，一度低見0.89元，累跌47%，認真慘情。睇番盤數，中期盈利跌32%，得番1259.9萬元，毛利率亦跌4個百分點至67.6%。經過一輪洗倉，OTO市值得番3億多啲啲，同殼價不相伯仲，佢有幾千萬Cash揸手，壞消息已反映得七七八八，呢啲有盈利、財務狀況亦穩嘅股，隨時會惹來資金炒作。OTO上周五收報1.03元，升2%，現價買入，以跌浪反彈0.382倍計，目標1.19元，潛在升幅16%，話唔定可以一步到位㖭！
唐牛