由神話破滅到神迹降臨，思捷（330）上周華麗轉身，放榜後純利雖跌咗74%，但股價立即一飛衝天，半日爆升25%。點解一隻賺少咁多嘅公司，竟然仲有叫座力。翻睇報告，統計數據，歸納出幾個原因，可能是以後尋寶的根據。
今次思捷一地碎眼鏡，緣於業績前大行都睇得很淡，瑞銀分析員估少賺九成，美林更開腔指會見紅，里昂於放榜前降級至沽出，大行一致睇淡，原來冇壞。忽然間亦明白周柏豪的碎玻璃潮文，其實充滿哲理，套用喺股票上，原來覺得最爛的股票未必是最糟，因為最糟的可能一直就在眼前而未曾發現。
思捷並非近期首隻爛股翻生股份，內地房地產死寂，傳破產N次的綠城（3900），1月9日見3.02元，上周五收6.22元，七周翻一番，置之死地而後生，係唔係咁簡單呢？
思捷及綠城極速反彈，除基本面似乎有改善外，最主要是衍生工具紛紛平淡倉所致。統計去年下半年，思捷沽空比率接近20%，48隻藍籌中排第六，沽空金額則超過44億元，排名十強以內。以當時一隻市值只有200餘億元的藍籌，半年間有44億元沽空，數字的確非常誇張，這亦難怪在淡友肆虐下，股價半年間瀉近60%。
騰訊逢高沽空必有斬穫
至於聯通（762），去年下半年無論沽空金額及沽金比率，皆是藍籌「一哥」，其間沽空總額187億元，今年至今跌13%，絕對未跌得夠，淡友肯定唔會收貨，這是股榮押注聯通今年慘淡的原因。
沽空是一把雙劍刃，傷人七分最終亦會自傷三分，上周四思捷午後發狂，股價能短短半日間飆升25%，非挾淡倉令淡友扯白旗，難以造成上述震撼。前車可鑑，筆者自然找尋今年淡友最愛，從中找尋造淡良機。
今年頭兩個月，建行（939）沽空額逾百億居首，騰訊（700）及國壽（2628）皆有50億元。至於沽空比率，騰訊以23.5%排第三，東亞（023）及國泰（293）分別有35%及25%。綜合兩者，今年除咗沽爆聯通外，QQ逢高必沽空，肯定有斬穫。
股榮