有「電訊魔童」之稱的王維基，昨日率領一眾員工，齊齊在將軍澳工業邨出席CTI電視及多媒體製作中心動土儀式，電視業大混戰進入另一個階段。曾在微博力斥無綫「totallyverybad」的黃日華，大讚新公司「candoindependent」，他更否認是叛將，表示藝人亦有機會轉投新公司發展。
昨日「電訊魔童」王維基與黃日華為動土儀式舞獅助興，投資6億港元的製作中心，預計2014年投入運作。王維基稱將會在4月開拍劇集：「我哋先同時開拍兩至三部劇集，預計今年製作十幾部合共260小時嘅劇集。藝員方面亦預計由140人增加到250人左右，總之我哋會門常開，希望同多啲唔同嘅演員合作。」
絕對唔係叛將
問到劇集的題材，王維基說：「我哋係採取一個崇尚創意方面嘅發展，唔想做嚟做去都係嗰啲爭產呀、你追我我追你嗰啲愛情故事，又或者來來去去都係嗰兩、三條橋，希望可以多元化，多啲題材。」至於會否邀請陳志雲加盟，王維基迴避說：「唔知人哋肯唔肯嚟幫手喎！我哋係好朋友，機會呢樣嘢就人創造嘅。」
曾在微博力斥無綫「totallyverybad」的黃日華，大讚新公司「candoindependent」（華哥今次食錯字，CTI變作CDI）。問到是否父女檔加盟，華哥笑說：「梗係搞掂咗我先再搞個女，佢本身都有興趣，我會喺佢旁邊睇住佢起步，畀啲心理準備佢。」對於有人在微博上形容過檔的藝人為叛將，華哥說：「我覺得呢個形容詞唔係咁適合，每一個藝人都有機會去其他機構發展，我哋呢一班唔係叛將，今時今日我哋去咗新嘅公司，係開國功臣，希望將來可以撈埋一齊玩。」
張可頤不再捱苦
專程回港的張可頤坦言，今次被王維基的誠意打動：「唔使我講大家都明，無綫咁多嘅基業已經有佢制度，唔係一時三刻可以改變，以前冇選擇可能會有啲辛苦，但係家好咗好多。」
被指遭無綫冷落而過檔的元華，相信與無綫仍有合作機會。林文龍則說：「今次簽約兩年，合作嘅自由度好大，但係太太（郭可盈）暫時都唔會簽約，以屋企為主。」
此外，王維基和張可頤分別接受商台訪問，王維基言語間似乎暗寸無綫不尊重藝人：「其實電視發展最重要係軟件，軟件即係人，所以學識尊重人係最重要。」張可頤則透露樂易玲及曾勵珍有了解她離開的原因，又不否定將來再合作。
採訪：何慧斯
攝影：陳志嵐