鄭嘉穎近期傳翻撻佘詩曼，曾和鄭嘉穎傳緋聞的內地女模徐靖雯，去年就蜜運成功，和西貢地王太子爺周子揚拍拖，日前二人被發現收工手拖手逛超市，買晚餐回家撐枱腳。
內地女模徐靖雯因和鄭嘉穎傳緋聞而為人所識，其後留港發展，去年更譜出另一段中港情，和有米歌手、西貢地王太子爺周子揚撻着蜜運。兩人愛得癡纏，不時情侶檔出席活動搵錢。
拖手喁喁細語
記者日前發現兩人在中環商場拍拖，晚上近9時，穿長褸、長靴包到冚的徐靖雯和周子揚在ifc拖手仔行超級市場。5呎9吋高的徐靖雯與近6呎的周子揚這一對高人筷子情侶，頗惹人注意，不過兩人未有理會，只是沉醉在愛河中，兩人沿途十指緊扣，細聲講大聲笑。
兩人走到超級市場，由本來的拖手仔，改為周子揚攬住女友腰，在外賣櫃前指指點點一陣，徐靖雯之後獨自上前揀晚餐，再去畀錢，男友就在一旁等候。當兩人發現記者在附近，即時害羞彈開，徐靖雯更嬌嗔道：「嚇死我啦！」周子揚拿着公文袋和大褸，表示女友體貼接他放工，他說：「佢頭先開完會，我又喺公司開完會，所以先拎住咁多文件，我哋成日都會一齊食飯，好開心。」
愛煮飯仔冧女
之後兩人大方讓記者拍照，又透露未拍拖前，已經常常煮飯仔，周子揚不時炮製甜品和美食，又買鑽石耳環女方，最後成功追到她。去年聖誕節，兩人更和一班朋友旅行，預支蜜月。
此外，周子揚昨日接受商台訪問，直認與徐靖雯相戀大半年，女友已見過其父母。是否結婚對象？他說：「有呢個諗法，但應該30幾歲先結婚。」會否批准女友看鄭嘉穎的劇集？他說：「佢鍾意睇咪睇，但未有機會一齊睇。」
採訪、攝影：盧妹、李珮洳