陳鍵鋒近年長駐內地搵人仔，年輕有錢又靚仔，被喻為一級筍盤男，但一直盛傳他不喜近女色。近日陳鍵鋒完成手頭工作從大陸返港，大前晚被發現跟無綫前音樂節目主持人周子駒（Cyrus）撐枱腳，二人穿上情侶橫間衫，坐在咖啡室促膝夜談個多小時，陳鍵鋒更負責做阿四買嘢食，盡顯男士風度。
現年33歲的陳鍵鋒去年向無綫「挑機」接受有線訪問，狂數TVB不是，行為man到爆，再加上陳鍵鋒近年專注返大陸拍劇做一線小生，事業一帆風順，理應吸引不少異性；可惜陳鍵鋒多年來在情路上交白卷，甚少有女埋身，難怪多番被質疑性取向。
陳鍵鋒在橫店演出的新劇己經殺青，難得返港充電，大前晚七時許，記者發現陳鍵鋒和Cyrus在中環史丹利街並肩而行，二人心有靈犀的穿黑白間條「情侶」T恤。二人行到一間咖啡店門外交頭接耳，似乎詢問對方意見，最終拍板入店內開餐。
食足個半鐘
二人揀了咖啡店內一角坐下，雖然陳鍵鋒的知名度比Cyrus高，但他甘心做阿四，寧願將帽子盡量拉低，單拖走出門口的售賣處付錢買食物；陳鍵鋒點完咖啡、意粉後，又過對面售賣處買雪糕，胃口似乎相當好。二人在店內一邊食一邊傾，之後還不停互玩手機，十分開心。約個半小時後，二人離開咖啡店行多一個街口才各自散去。
向好友取經
事後Cyrus聞言與陳鍵鋒穿情侶衫，在電話中大驚地說：「係咩？咁恐怖！唔怕人誤會，間條咁流行。」他表示入行已認識陳鍵鋒，由於離開無綫未定去向，故向陳鍵鋒取經，他說：「見陳鍵鋒喺大陸發展得好，問吓意見啫。之前收過王維基短訊，但當時唔知乜事錯過咗。」陳鍵鋒則至截稿前仍未回覆。
採訪、攝影：龍婉琪、黃曉程、黃文成
