熊黛林（Lynn）和郭富城近期爆出6月婚期，Lynn更表明要光明正大結婚，又大談男友。不過，Lynn昨晚出席活動時，忽然和城城劃清界線，以朋友相稱，指兩人緋聞是一場誤會，被問可是戀情講得多惹不滿，她即一臉委屈，似乎遭男友投訴詐型。
熊黛林和張震昨日傍晚在中環出席TagHeuer腕錶活動，同場還有玩具大王蔡志明細仔蔡加讚，穿紫色緊身裙的Lynn比張震高了幾吋。Lynn和城城早前爆出6月結婚，Lynn之後表明恨嫁並要光明正大結婚，又暗爆城城情人節送吊墜，不過事後遭城城否認。
祝城城快娶妻
Lynn在活動上心情明顯麻麻，全程只是咪起嘴微笑影相，一提到城城拒認送禮，Lynn即扁扁嘴：「唔想回應，以後都唔想回應。你哋唔好再講佢嘅事。」分了手？她即說：「我都冇認過，點會分手？」她最近出席活動，不時甜蜜提城城，問到可是惹人不滿，Lynn聞言即一臉委屈，表現得不開心：「唔知點講。」有傳城城和Lynn拍拖，城城經理人小美一直不滿女方借城城宣傳，莫非小美不鍾意？她聞言即說：「我唔識佢，唔知佢嘅諗法，都冇見過佢。」
問到是否與城城有共識封口？Lynn即劃清界線說：「唔係共識，朋友係朋友，唔想再誤會落去！」她煞有介事，多次強調和城城是朋友關係，至於之前傳出婚訊，她即說：「唔想講，再咁寫落去，真係冇人要。」她又形容自己未婚及沒約會，既然兩人沒婚期，那麼可想城城快快找個女友結婚？Lynn即晦氣說：「希望啦！」
張震認定女友
張震則透露新年期間，與拍拖一年的圈外女友、家人一齊去日本滑雪，更坦言認定女方是結婚對象，對舒淇和王力宏傳緋聞，他指沒細問，但會祝福舒淇。
採訪：林嘉慈
攝影：陳順禎