我的老朋友阿Wing，自細都係名副其實的香港仔，我哋幾個兄弟都在橫頭磡長大，仔時代最鍾意放學後到街場跟隊，我哋為咗同人爭場，搞到性格都相當好勇鬥狠，惟獨阿Wing就係和平大使，無脾氣亦與世無爭，皆因佢最愛嘅位置就係龍門，所以阿Wing一路都係我哋嘅開心果。
雖然性格不同，但我哋都係熱愛紅魔鬼曼聯！七、八十年代曼聯唔係班霸，唔及利物浦同阿仙奴咁威，但係佢哋喺盃賽都好醒㗎。我哋讀書麻麻，試過喺球場發白日夢，夢到有一日一齊飛去奧脫福，現場感受紅魔嘅威風！隨住畢業後就唔記得咗呢個念頭。阿Wing去咗尖沙嘴酒家學做點心，我哋就冇乜來往，聽講後來阿Wing去咗外國洗大餅。
阿Wing係我偶像
輾轉30年，最近終於收到阿Wing消息。原來呢段日子，佢不但年年現場睇10場8場曼聯賽事，還竟然成為了費格遜的顧問，朗尼的知心友，以及碧咸的「戰友」㖭。阿Wing，你簡直係我偶像！
阿Wing，是曼徹斯特市一間中菜館的老闆，菜館每天爆枱，當中會有兩、三枱是球星預訂的。佢能與球星相識，要多得孫繼海和董方卓先後加盟曼城和曼聯，兩次阿Wing都自薦做繙譯和服務，慢慢建立信任。今日在他菜館裏，最搶眼的裝飾，是過百隻球星簽名瓷碟。
香港人一直精於建立人際關係，但阿Wing的成功，卻是因為交心。當年史譚叫外賣，他會自己送上門；董方卓在比利時外借期間，他拍心口向費Sir自薦到彼邦打點一切；碧咸上門食飯遇上狗仔隊在門外守口，他會扮保鑣將碧咸座駕駛走引開注意。費Sir食飯，他會預備印有費格遜中文名的筷子讓他專用……難怪朗尼今季慘敗於曼城1:6後，還肯在當晚到阿Wing餐館做生日，因為阿Wing早已預備好朗尼最愛的椒鹽排骨來逗他開心！
我其實只是今次曼城之行才認識阿Wing，當然不是老朋友；但我相信很多香港球迷都想和他做朋友，因為他，可能是最了解英超球星的香港仔。
keyman