星期三晚嘅歐聯16強首回合相信搞到一地眼鏡碎，拜仁慕尼黑同國際米蘭兩大班霸齊齊作客輸0:1；咁啱得咁繞，兩隊分別都喺比賽尾段失波，臨尾香！
拜仁呢場作客巴素利，親身感受到點解呢隊瑞士班霸連曼聯都砌得低，上半場人哋嘅阿歷山大費爾已經有球中楣，到換邊後拜仁心急搶攻，後防多空位，結果俾史托卡喺86分鐘射入，僅負0:1。比賽仲有段小插曲，列貝利被換出嗰陣，拒絕同教練希歷基斯握手，雖然希帥賽後話佢哋之間冇心病，但拜仁會長漢尼斯就狠批列貝利唔應該咁做。
至於國米作客馬賽，就真係抵輸嘅，教練雲尼亞里竟將近7仗唯一入過波嘅迪亞高米列圖擺喺後備，結果攻極都唔入之餘，喺補時階段仲俾對手嘅阿休頭槌絕殺，全場輸0:1。另外，右閘馬爾干傷出，懷疑十字韌帶撕裂，若果係真，就肯定收「咧」。