英超「1哥」曼城近排啲好消息一單接一單，先係叛將泰維斯認錯歸隊，繼而喺前日歐霸盃大炒上屆盟主波圖，昂然晉身16強。
家陣佢哋個勢又好，而且仲要「夫添」，唔怪得喺英超同埋歐霸盃都被捧成奪標大熱。家佢哋叫兩飛，我求大俠都睇好曼城可以喺季尾做雙料冠軍。
泰仔回歸如虎添翼
曼城禮拜三晚喺主場同葡超波圖進行歐霸盃32強次回合，憑阿古路、迪斯高、大衛施華同埋大衛比沙路各入1球，輕鬆贏4:0，兩回合計贏6:1，下一圈將會對波蘭嘅歷基亞或另一支葡超球隊士砵亭。我求大俠有睇場波，佢哋嘅進攻真係好掂，無論係阿古路、迪斯高抑或大衛施華，都足夠搞到對方後衞疲於奔命；家陣仲有番泰仔，簡直如虎添翼。領隊文仙尼仲話，同佢關係破冰嘅泰仔只要操兩、三個禮拜，就可以落場比賽；加埋隊中幾位世界級進攻球員，簡直恨死隔籬。
文帥：盡力爭歐霸盃
文仙尼賽後咁話：「今晚我哋仲有好多入波機會，可惜把握唔到。波圖係歐洲其中一支強隊，要贏佢哋真係唔容易，所以我好開心能成功晉身到下一圈。我哋當然想入決賽，但歐霸盃有曼聯、華倫同史浩克等，同歐聯一樣強隊林立，因此唔係話入就入，但係，我哋一定會盡力而為。」
曼城今個周末場英超，主場對尾4嘅布力般流浪，以佢哋現時嘅狀態，加上今季聯賽主場12戰全勝，呢3分睇怕都冇走雞。至於以兩分落後嘅同市宿敵曼聯，就會作客諾域治；雖然諾域治係升班馬，不過打得唔錯，排喺第8，其中最近主場試過0:0悶和車路士，若果紅魔唔打醒十二分精神，分分鐘失分而回。
另外，曼城迎曼聯嘅英超榜首大戰，原本喺英國時間4月28日（周六）下午上演，但因為要遷就電視台直播，所以場波改喺4月30日（周一）夜晚8點開波（香港時間凌晨3點）。換言之，本地球迷想睇好波，到時就要捱夜啦！