當iPhone廣告都標榜：「你唯一需要嘅相機就係iPhone！」而街上一眾港男港女，包括你自己，可能都樂此不疲用iPhone自拍、影嘢食、影風景。既然係咁，何不一不做二不休，將iPhone變身？其中一個日本DesignCase，手工精細，絕對有能力令人以為佢係真相機，注目度一百分！
記者：韓繼聰
攝影：譚盈傑
Model：Tina@InterplayWorkshop
高度像真系
講到「無聊事認真做」，日本人當然可以稱為達人。就連幫iPhone變裝做相機，都一樣做到一絲不苟，極度像真。由日本Gizmon設計嘅復古風iPhone殼，手工精細，正面睇真係同一部古董相機極似樣。外表呃得吓人之餘，亦不得不讚佢嘅細節，仿真鏡頭其實係自拍鏡，方便各位自拍Chok相。而隨機亦附送一個極薄餅鏡，換咗就更方便你袋入袋，果然係做戲做全套！快門掣相當有質感，更有小底座方便你裝上腳架，你話同真相機有咩分別？
女生可愛系
像真系可能啱男仔多啲，女生嘛，都係偏愛「卡哇兒」嘅可愛系多啲。Candies嘅「膠膠哋」Case一向深受女生喜愛，新嘅相機系列繼續以誇張造型加搶眼配色吸引眼球。若嫌太誇，則另有淨色系列俾你揀，雖然設計簡單，但勝在顏色鮮艷可愛，加上Candies招牌的柔滑軟膠，帶來舒適手感，女生們應該好難抗拒。
香港區都有好設計，iFAN'S一款Case睇外形就知向GF3致敬，雪白渾圓，幾可愛㗎。「鏡頭」拆得之餘，內裏更有內部CMOSFakePrint，真抵死！
型仔實用系
要扮嘢扮得型，質料其實都係重要一環。Fashion界熱吹Outdoor風，木紋自然成為型格素材之一。木材Case其實一直都有唔少，但今次刻出Leica相機圖案，低調得嚟卻潮味十足！買唔起真Leica，用個木紋Leica一樣咁型。另外，仲有一個實用代表，雖無相機外形，但就可幫iPhone「換鏡」。轉吓輪盤上圈圈，即可玩出9種特效，貪玩兼多心人士，必愛！
簡單一轉就可玩出9款特效Filter，包括菱鏡及不同顏色，隨時可以玩出意外驚喜。（iPhone版$268、GS2版$288/a）
查詢：
a.三禾電氣 （23740618）
b.iFAN'S （64705082）
c.又一豆腐屋 （23990083）