宅錄：超合金筷之魂

宅錄：超合金筷之魂

筷子！兩根小棍，結構簡單，但就係我國一大發明；史料記載，早在三千多年前新石器時代就已經有筷子，好多人推測當時人是為了食火烤食物，又不想燙手而發明，自此奠定了中國人飲食文化！

記者：陳家蕊
攝影：黃子偉
Model：Paris@PureModels

抵受200℃高熱

喺香港，常見有酒樓膠筷、雲吞麪檔竹筷，同跟飯盒甩皮甩骨嘅軟木筷，至於早年被禁嘅象牙筷，更早已名存實亡！筷子素材真係就咁簡單？筷子專門店——筷之藝就話唔係囉！
超合金筷子！驟眼睇，你會以為淨係尾部金屬部份先係合金，實際用落，發現黑色部份都滲出陣陣凉意，竟然係採用全金屬設計！佢可以承受超過200℃熱力，放入洗碗碟機完全唔成問題，另外合金筷子唔吸水又耐用，好可能用到一世，絕對符合環保原則！合金唔係機械人專利囉！

■純色環保合金筷（一套兩對）$128/a、Narumi鍍鉑金碗、碟（各$220/b）兩相配合，感覺富麗華貴。

■花圖環保合金筷（一套兩對）$188/a

矜貴手選　清明上河圖

古人所用的一對筷子，原來已經可以彰顯咗佢嘅身份地位！皇帝御筷會釀上純銀製的頭，以測出食物是否有毒；達官貴人則用金筷，或以質優木筷鑲上玉石等雕飾。筷之藝負責人林小姐就話當中尤以烏木筷子最矜貴，用來送禮更覺體面；「筷」與「快」是同音，所以送筷子有送快樂及快生貴子的意頭，故非常適合做生日及結婚禮物。

■陶瓷筷$136/a
陶瓷做的中式花紋筷子，其實只供欣賞，但極受外國遊客歡迎。

■紅木花筷套裝$296/a
原來紅木印上花款絕非易事，再用新的磨砂技術打磨頭部，增加食物與筷子的磨擦力，令更易挾起食物。

■清明上河圖印在尾部，連起來時就好似一件藝術品。

■紅柯木清明上河圖筷套裝$275/a
整套筷子連筷子托也印上清明上河圖，用作宴客除了夠體面，更可引起大家茶餘飯後的話題。

烏木純銀筷$858/a
簡單外表，竟用上烏木作材質，加上純銀釀頭，是古代皇帝御筷典範。

酸枝木深海貝殼筷$648/a
深海貝殼取代傳統玉石，配上有百年樹齡堅硬的酸枝木，揉合古今中國韻味。

結婚筷選

■烏木龍鳳呈祥筷$538/a
兩對合上就是龍鳳呈祥圖案，更刻上白頭到老、天賜良緣的字眼，夠晒意頭！

■紅雙囍筷實色紅$40/c、透明紅$35/c
大大個紅雙囍紅色筷子，結婚用就最啱晒！

可愛玩味　變種大衣夾

唔講唔知，現代的科學指出，長期用筷子，可使人手指靈活、頭腦更聰明！所以有諗頭嘅設計師，再想出充滿難度與玩味嘅筷子，希望大家再聰明啲！

■仙鶴筷$85/c
仙鶴對腳就係筷子，除下更加可以做埋筷子托。

■衣夾筷$78/d
唔講係筷子都唔知做乜有咁大隻衣夾，夾型的筷子其實專係俾唔識用筷子的外國人用。

■顏色筆筷$92/a
細個上堂興玩鉛筆夾擦膠，估唔到真係有顏色筆筷子，滿足兒時的夢幻。

筷知識

為何有啲筷子頭好尖，有啲係圓頭呢？原來圓頭的是中國款式，方便食飯，而尖頭的則是日本款式，方便他們食用魚生。

查詢:

a.筷之藝（22593902）
b.集雅廊（25218686）
c.G.O.D（27845555）
d.Homeless（29978192）