寫樓市分析基本上有一個元素不可或缺，便是資金流向（FundFlow），亦是老樓過去多年依賴的搵食「架生」，其他如房價收入比、樓價指數等等一大堆數字根本是呃人、滯後，有錢可以隨時入市、無錢得個睇字，故此分析基本是看交投量比較實際。
過去一個月點解個市轉變得那麼快，便是資金重投樓市，推動成交量；銀行放水，中小型單位獲新買家支持，水閘唔放水市場肯定大鑊，因此見到勢頭差唔多由衰轉盛，轉折點由兩大銀行放水日開始。
資金未捧中高價樓
在農曆新年前，兩大銀行在團拜時已「打晒眼色」，仲有，銀行有新配額可以放水的傳聞，消息落入地產代理的耳中，首先傳達相熟的投資者好友，在樓市尋找筍盤重點出擊。
老樓認識的一名新界區投資者，便重點出擊專吼大屋苑的細單位，由210萬元挫到200萬、300萬元壓到270萬元，收購密集區介乎200至300萬元之間的細價樓，結果過去一個月便好彩趁大市到底前成功撈底，先後買入幾件靚貨。
老樓問他唔擔心銀行唔肯借錢嗎？他解釋他根本不用借太多錢，只因為銀行放水下置業者回投樓市氣氛一定有改善，一齊入市推高樓價，那時候低價買入的單位亦會水漲船高，「區區動用了千萬不重要，那時市場釋放了逾100億資金投入市場（住宅整體成交額），群帶效應下鎖定成本，根本唔會輸。」
早在去年平安夜出版的本欄內已預示樓市小陽春來臨，外間數據派仲發緊夢，仲話上半年樓市進入跌浪，老樓反指從資金流入新盤細價單位已經見到資金回流，但只是細價樓受惠。至於後市，尚未見到資金追捧中高價樓迹象。
劉兆昌
資深地產傳媒人
http://www.HKLau.com