伍詠薇今日43歲生日，前晚老公練海棠幫佢喺南區搞生日派對，同好朋友袁詠儀、周麗淇、蔡一傑、蔡一智等食法國私房菜，順道幫同佢同日生日嘅陳法拉、練海棠細佬，同差一日嘅伍姑娘阿哥Richard賀壽。生日會主題係蝴蝶同煲呔，袁詠儀着晒踢死兔直情係《金枝玉葉》嘅林子穎上身！
老公悉心安排
伍姑娘噚日喺電話度話：「我自命飲得，乜嘢酒都冇問題，但就俾私房菜老闆嘅一隻shooter隊冧咗，我仲嘔到洗手盆都塞埋。」伍姑娘話原本唔想搞生日會，但成日話2012係世界末日，所以借啲意約埋至愛親朋一齊過個開心晚上，伍姑娘話：「見到班朋友都玩得咁開心，覺得自己好幸福。」
伍姑娘梗係幸福啦，佢老公除咗幫佢安排好晒派對嘅嘢，事前仲問佢想食乜嘢，伍姑娘最掛住就係已過身媽咪整嘅炆豬脷，點知練海棠居然叫私房菜個師傅特登整呢味餸，仲要鬼咁好食，令佢既感動又冧爆！