港股踏入2012年頭個多兩月突然神勇，恒指升幾千點，資金到位尋寶，不少出名醜股也突然翻身；歐洲球季去到中後段，好醜也要現形，財力野心缺一不可，英超今季混戰極難賭，下半季要多嘗試還原基本步，向信心聯賽英冠埋手，小弟也堅信本欄有翻身的一天。今天捧老朋友列斯聯及韋斯咸，新氣象下繼續向升班路進發。
英超成立十多年，向來自恃強勢，可惜也敵不過經濟大氣候，喺歐聯，列強受到沉重打擊，幾定無一入8強；講天氣，英國正出現近30年最嚴重嘅旱災，好似個天畀晒提示佢哋：注定「莫財」！北邊蘇格蘭班霸格流被財務接管，扣10分賣球員，小弟識睇波以來，聞所未聞；另外南邊老樸情況更糟，被清盤後揸數嗰位勒令即刻要放血減債，剛走了最入得波嘅挪威射手侯錫納普，借去「醜股正翻身」嘅伯明翰，走唔甩嘅主力就被勸喻減薪共度時艱。你話近年喺老樸踢波幾悲哀，班波注定下季英甲見。
唔係莫財就會放軟手腳，但好似老樸今天主場鬥列斯聯咁，成隊波健全嘅得番十二、三人，後備都唔夠數。列斯聯則眼見離升班區走遠了，改聘鐵血老領隊、小弟好欣賞嘅前昆軍禾諾克掌帥印，呢個中氣十足老傢伙，教英冠救亡最啱；上仗單喺觀眾席遙控，已見球會落後兩球主場反勝唐卡士打，終止連敗，士氣正回來。今次領兵南下擁射手羅斯麥哥馬克及辛迪加斯等夠殺，馬會唔似梳打埠咁豪，有平手盤賭，焗波友買「主客和」2.3倍W，建議波友兼投有4倍幾嘅[-1]，博老樸最可靠嘅後防都散埋。
重心，可選英冠今天早場擂台躉韋斯咸，迎水晶宮開穩W。韋斯咸被小弟認定蠱惑的波，今季唔少以為「易絲W」嘅波輸得好醜，無他，大超班馬前中段同你慢慢玩；上仗大部份時間踢少個，用中場打龍門照炒近期氣勢強盛嘅黑池，可見其實深具實力。大把水，上月再添兩位英冠射手，上仗即有「士哥」，國家隊龍門羅拔格連上訴得直不用停賽，喜事重重；聯賽已轉緊彎準備入直路，睇吓佢哋今天會唔會又有紅牌阿姑，但照贏有個「水」字，實際好水嘅水晶宮。
下次見報(3/3)
蘋果波神
今日重心推介
熱選
韋斯咸勝(1.58)
冷選
列斯聯勝[-1](4.5)