中午吃飯之後，在各大商場行一個圈，當作運動，幫助消化，由IFC行到中建大廈間書局Dymocks，書局盡頭有一間「太平洋咖啡」，順便走入去買杯薄荷茶，就見到豪宅大經紀C在座嘆咖啡，於是打句招呼，順口問：「呢度啲咖啡好飲咩？」大經紀C答：「星巴克咖啡十分美國，好似水一樣，呢度啲咖啡好飲啲。」唔，歷山大廈間星巴克經常客滿，中午時份水洩不通，中建呢間「太平洋」就靜一啲，可以坐低傾吓密偈。記得大經紀C賣過不少豪宅，可能知道一啲地下室嘅事，於是問佢：「啲豪宅獨立屋多唔多僭建地下室？」大經紀C眼眨眨：「點答呀，我要做生意搵食嘅啫，唔可以洩露人客住宅嘅私隱。」左丁山再問：「又唔係問你人客啲嘢，只係講吓大概啫？」大經紀C話：「Well，putittothisway，九龍塘啲獨立屋豪宅雖然成間屋嗌價好高，但以呎價計，幾跟貼市場。夠鐘開工嘞，拜拜！」
講乜呢喂？佢話中好似有骨，一時諗唔通。落番去雲咸街，撞到中貿林等一班人從南華大廈走出嚟，中貿林居然話：「我趁熱鬧走咗去九龍塘約道5A、7號門外影相，先至發覺中聯辦九龍工作部辦公室就在對面，由此可見中聯辦九龍工作部與唐先生住宅有近水樓台之利。」咁講法，有無政治遐想呀？中貿林話：「我地知識淺薄，諗唔通！」
呢輪中環人會面，三句不離選舉，好多人驚住押錯注，表態十分小心，特別係曾鈺成宣佈考慮參選之後，以曾先生之背景，只要佢一聲話去馬，無人敢批死佢選唔到，只不過事急臨忙，不少工聯會民建聯中人已心繫梁營，有冇法子轉軚改投曾先生呀？另一位葉劉正在盡最後努力，但佢冇鐵票班底，入直路仍然落後十幾個馬位，末段有無21秒幾咁勁呀？唔敢講，唐英年呢隻馬雖然甩咗馬蹄鐵加上騎師跌鞭，仍然在前領先入直路，支持者大嗌頂住，頂住，還是隻馬頂唔順要拉停呢？誰也說不定！看台上有人傳出，跑道上來到終點前，仍有鞋釘等隻唐馬踩落去，睇隻馬避唔避得開嘞。