嚟緊卡迪夫城對利物浦嘅英聯盃決賽唔會播國歌！喺08年嘅英足盃決賽，嚟自威爾斯嘅卡迪夫城（圖）對英格蘭嘅樸茨茅夫，喺賽前播兩國國歌嗰陣，球迷互相柴台，為咗避免呢個情況再次發生，所以英足總決定今屆英聯盃決賽唔播國歌。當局仲話，如果以後有威爾斯球隊打入呢類盃賽決賽，都唔會播國歌，避免觸動球迷情緒，引起衝突。