無綫體育記者姚雋彥近日人氣大升，俾網民熱捧為伍晃榮接班人，皆因佢報道體育新聞時金句多多，仲不時套用近期hit爆嘅時事同娛樂新聞金句。好似佢報道足球新聞試過引用唐唐僭建金句「違規就係違規，冇得卸膊嘅」，又試過用大文豪周柏豪嘅潮文嚟報道NBA賽事，話「有時用上慢鏡，可能比正常的形態更美」，相當搞笑。
緊貼娛圈新鮮事
原來，05年浸大傳理系畢業後喺同年加入無綫嘅姚雋彥，好鍾意聽歌睇演唱會同舞台劇。馮仁昭喺佢微博見佢又睇Wyman（黃偉文）又睇Edmond（梁漢文），就連近期何韻詩舞台劇《賈寶玉》都唔錯過，咁緊貼娛圈，又難怪佢隨口都噏得出大文豪嘅金句。上星期唐唐賣妻求榮將僭建卸落老婆度，佢就話：「糖太終重新演繹林宥嘉的《說謊》，不禁令人聞之落淚……香港男士只能合唱Twins的《丟架》回敬。」隨口都噏得出歌詞歌名，可見佢係忠實樂迷。
姚雋彥平時都好搞笑，佢舊年萬聖節扮法老王跳蛇舞。另外，佢又係「夏體硬足球隊」（即係夏季成立的體育記者硬地足球隊）隊員，周不時落場顯身手。
