古巨基前晚首度自導自演拍廣告，上月陳奕迅（Eason）在港台頒獎禮後台寸爆基仔未夠班，基仔前晚首度開腔回應「強敵論」，但就避談說：「上世紀嘅嘢唔回應。」又強調與Eason有偈傾，大家各有所長，更撐自己勝在夠大隻，莫非暗寸Eason唔夠弗？
古巨基和陳奕迅經常被外界拿來作比較，上月Eason在港台頒獎禮後台接受訪問時，寸爆說：「你們覺得古巨基是我的強敵嗎？」由於事後基仔一直離港工作，直到前晚他到數碼港拍攝首個自導自演的廣告，故從未回應「強敵論」。
「我練大隻咗」
前晚基仔被問及強敵論時避忌說：「上世紀嘅嘢唔回應，有留意過段片，但過咗去。上次做碟同佢用同一個錄音室，大家都有傾偈，大家都係想做好本份，各有所長，呢排我就練大隻咗。」似是暗寸Eason身型不及他弗。
早前黃偉文（Wyman）在紅館舉行作品展，當年Wyman曾為基仔寫過不少金曲，但兩人傳不和多時，基仔指自己沒有接到Wyman的邀請，但也戥他高興，基仔表示因為近年他做概念大碟，所以只找一個填詞人，他說：「好幾年冇合作，少來往，冇話少咗感情。」對於連楊千嬅都成功破冰，基仔說：「咁咪幾好，有啲surprise。」
此外，基仔前晚借用朋友800萬勞斯萊斯進行拍攝，他笑言廣告商給了他一筆製作費拍攝，現時已拍了三日，他說：「因為未埋單，所以都唔知賺唔賺到導演費。」
採訪：胡比
攝影：黃偉雄
