「人物表：─糖太（小儀飾）、糖生（森美拉長塊面飾）、泛泛之交（金剛飾）、良師益友（煲呔客串）」
糖生開口及着脷舌頭早已喪失功能，但在一片噓聲中仍堅持報名參加「品酒大賽」。門外抗議喧囂：「你係咪男人嚟㗎？你連酒品都冇點樣品酒呀？」但因有四大紅酒商霸以及富豪支持，最終提交了報名表。回家竟然不見糖太。等到三日兩夜後她滿面春風腳步浮浮開門。
「老婆你去咗邊？」糖生強捺怒火：「我以為你晌屋企填氹─」
「過大海春茗吖嘛。」糖太出示手機相：「我撞到你舊老細阿良師益友，不過現場紅黃藍白黑人馬齊集，見有記者佢未起筷就閃嘞。」
「呢個呢？攬晒膊頭貼晒面！」
「哦。」糖太甜笑：「咁佢有膊頭我咁啱冇腰骨，烟靭咗啲─佢係泛泛之交嚟唧。」
「收尾呢？」
「超級遊艇自駕遊。不過我地有俾錢，避嫌吖嘛，每人三百蚊港澳渡輪費。」
「一力承擔咁話咯喎？」
「Honey你係好人我係壞人，地牢個氹挖得咁深點填？幫你頂咗罪一個唔好彩要食皇家飯㗎，惟有及時行樂啦……」