周秀娜和男友陳偉成（Avis）拍拖多年不時耍花槍，近日傳他們在泰國秘密結婚，前晚娜姐到銅鑼灣出席春茗時不但否認婚訊，更氣冲冲透露和男友在泰國炒大鑊險釀分手，不過Avis送上親手造的水晶電話殼冧掂娜姐，她則送自己當回禮。
周秀娜在情人節期間難得放假和男友陳偉成到泰國玩，前晚一身陽光味的她到銅鑼灣出席中國3D數碼娛樂有限公司的春茗，不約而同跟溫碧霞同穿露肩裝，娜姐更谷事業線成功搶溫碧霞鏡，同場的劉心悠、趙碩之、羽翹和石詠莉等亦相繼被比下去。
送自己當回禮
問到娜姐是否不覺凍？她說：「梗係唔凍，仲成身熱氣，因為啱啱喺泰國返，但係谷住道氣。我咁難得放假，情人節同男友去泰國玩，點知出發佢先知個護照過期，要搞快證，搞到要先去海南島再去泰國，但只可以玩幾日，真係好唔夠喉。」
有傳娜姐和Avis在泰國秘婚，娜姐聞言火上加油說：「冇分手咪算好囉，仲話結婚㖭。男友到咗泰國又病，所以其實冇乜點玩，好唔夠喉。」是否因身材太惹火令男友谷到病？娜姐聲稱只因泰國太熱才令男友病倒，但她不忘笑言：「如果佢對住我冇感覺就死得。」Avis送甚麼情人節禮物補鑊？娜姐即甜笑大方透露Avis送上親手砌、花三日造的iPhone水晶電話殼，殼上還有娜姐英文名。娜姐有何禮物回饋男友？她笑言：「咪送我個人。」
溫碧霞密接戲
溫碧霞透露近日接洽新戲中角色會搭上有婦之夫，下月又開新戲扮江湖阿嫂，會與久違的陳庭威合演。溫碧霞專注拍戲，豈非沒有時間湊養子？溫碧霞稱：「嚟緊9月佢會返幼稚園，自己都唔想佢咁依賴。」老公會否詐型？溫碧霞表示：「家唔做等幾時，同埋同個仔少見啲佢會掛住我，感情仲好。」另外，張智霖（ChiLam）表示為拍新戲要減肥，希望減20磅。老婆袁詠儀埋怨在囝囝魔童前被迫扮衰人，ChiLam笑言：「呢啲係幸福小事，每個屋企都有，咁我喺老婆面前咪又係壞蛋一名。」
採訪：黃曉妍 攝影：仇志德