玩具大王蔡志明兒子蔡加讚和汪圓圓拍拖一年，兩人已經甜蜜到漏，前晚蔡加讚偕母與汪圓圓及父母，一同出席李雲迪演奏會，儼如一家人，蔡加讚坦言一直計劃結婚，汪圓圓更講明希望如唐英年太太愛護老公般對待蔡加讚，相信兩人婚期不遠。
李雲迪前晚和一班學童在九龍塘合作演奏，為保良局籌款，不少學琴子女的名人家長都有出席。賭王二房女兒何超鳳透露大女考完鋼琴八級、細女則學楊琴，兩人已到外國升學，她說：「都會成日飛去探佢哋，掛住㗎，但都會習慣。」問到家姐何超瓊（Pansy）和俞琤的同性密友關係，她即說：「佢咁大個人，識得處理㗎喇，你哋唔跟住佢，佢咪唔會煩囉。」Pansy現時是否更開心？超鳳說：「佢一向都咁開心。」
見家長緊張
玩具大王蔡志明太太蔡李蕙利搞演奏會，蔡家舉家撐場，大女蔡加敏的三歲半女兒一見記者影相就伸脷做鬼臉，十分搞笑。
細仔蔡加讚陪同女友汪圓圓及其父母一齊到達，蔡加讚陪未來外父外母，他說：「佢哋好nice，初期唔熟，見到會好緊張，家好好多。」有否催婚？他說：「等我哋決定啦，女朋友喺度，我唔講咁多。」
認真計劃中
問蔡加讚有否計劃結婚？他則表現成熟說：「我係認真，一直有計劃，但未知幾時，順其自然啦。」提到唐英年太太努力護夫，汪圓圓即說：「我都希望將來可以咁愛我另一半。」甜蜜滿溢，相信兩人婚期近。
採訪：林嘉慈 攝影：黃偉雄