桌球壇怕醜仔丁俊暉大膽示愛！唔係我求大俠亂吹，係真有其事，佢女友係四眼妹，仲叫蘋果（Apple）；小丁周日贏咗威爾斯公開賽冠軍後，可能心情太靚，仲爆埋自己喺英國設菲爾德新居入伙，實行新居藏嬌。
公開愛的宣言 買大屋住埋
今次小丁真係不打自招，佢喺威爾斯公開賽決賽，以9:6擊敗「1哥」沙比後，竟然情不自禁去多謝在場女友Apple：「Apple幫我好多，佢不特止照顧我起居飲食，仲每日畀我空間同時間去專心練波，比起以前冇女朋友照顧，家嘅我好好多。」
得到男友自動承認自己嘅地位，唔使再做隱形女友，斷估Apple都甜番晒啦；事關嚿年8月，其實已經有人喺北京拍到小丁同一位四眼妹喺停車場激吻嘅相，佢哋嘅《丁俊暉親吻“眼鏡妹妹”》視頻不知被點擊過幾多次；之不過小丁當時冇承認，亦冇否認；今次男友咁公開多謝自己，乜氣都消晒啦！根據知情人士講，Apple姓章，唔係傳說嘅富二代，係雜誌編輯。兩個撻着，係有一次女方要訪問小丁，但搵唔到，就聯絡上丁父，由丁父撮合下，兩個由訪問到拍拖有好幾年時間；Apple近年仲做埋跟得女友，係英國負責男友起居飲食。
愛情得意嘅小丁仲自爆喺設菲爾德豪宅區，買咗間5房連車房嘅獨立屋，兩日前先攞到鎖匙，仲諗住喺車房擺張波枱，兩小口真係足不出戶，日對夜對都得！我求驗客就覺得，小丁終於肯承認自己戀情係好事，畢竟佢已經唔係當年嘅「神童暉」，都成24歲，談情說愛幾咁平常；好似佢周日手下敗仗、27歲嘅沙比上年5月都成家立室啦。
剛捧盃世界排名上第7
小丁桌球事業都起飛，今次首奪威爾斯公開賽冠軍打破26個月世界排名冠軍荒後，世界排名由第9升到第7位，下一步佢話要喺4月世界錦標賽揚威，希望愛情事業兩得意！
