圈中龍仔龍女又將添一名！育有一子的李樂詩（Joyce)，昨日宣佈懷第二胎，陀龍B三個月。她經常叫囝囝摸肚親親BB，但坦言搵床位壓力大，大肚又心情波動，經常發老公脾氣，要向老公saysorry！
繼陳慧琳、楊千嬅、朱麗倩及郭羡妮等，龍媽媽陸續有來！李樂詩昨日在數碼港出席嬰兒車嘉年華，腹部圓圓宣佈有喜三個月，李樂詩帶住兩歲大仔Max出席，兩母子大方合照、紮紮跳，Joyce開心說：「好多朋友成日問我想唔想生，我要忍住，家終於可以講得喇！係有咗三個月左右，因為個仔都兩歲，有多個小朋友可以陪吓佢。」
未知BB性別
李樂詩謂Max唔知自己大肚：「我成日捉佢隻手，摸我個肚話入面有個baby，唔知佢明唔明。」她謂仍未知仔定女，但希望可以生小龍女，為囡囡扮靚。龍年旺生育，連床位都緊張，她即說：「係呀，搵床位真係好大壓力，因為好緊張，醫生一驗到我有，就叫我要即刻去訂，好彩都訂到，應該係last兩三個位囉。」
要向老公道歉
李樂詩陀仔有經驗，坦言今胎相對不算辛苦，但早期的作嘔作悶難免：「對氣味好敏感，有時去餐廳一聞到，要即刻衝出門口，同埋心情好波動，對住老公唔係咁好態度，事後知錯，會同佢道歉番。」李樂詩大肚也不停工，早前去完多倫多登台，近期更和郭錦恩合作出兒童教育MV，努力搵奶粉錢。
同場還有柏安妮、童愛玲等，童愛玲幸福透露早前八歲兒子情人節後送花：「我要拍洗頭水廣告，老公情人節飛咗，囝囝就代爸爸拎朱古力同花探班，好sweet。」
採訪、攝影：盧妹
