唐英年（HenryTang）因為喺約道7號嘅大宅僭建地下唐宮，搞到誠信破產，隨時連特首都冇得選；咁啱得咁橋，現效紐約紅牛嘅阿仙奴名宿亨利（ThierryHenry），亦因為想將佢間喺北倫敦嘅豪宅改建成為「海洋龍宮」，引嚟唔少反對聲音。
起4層樓高巨型魚缸
呢名法國前鋒雖然近年去咗美國發展，不過為咗多啲同英國模特兒前妻所生嘅囡囡迪雅一齊，所以佢冇放棄喺北倫敦嘅住所；為咗興建有4層樓咁高、可容納300條魚嘅魚缸，34歲嘅亨利已經申請將佢北倫敦嘅590萬鎊（約7,300萬港元）豪宅拆卸重建。
據報，單係要建造呢個5,500加侖嘅超巨型魚缸，就要25萬鎊；除咗建造費之外，要保養呢個高40呎、長15呎及闊3呎、由地庫伸延到3樓嘅魚缸，保養費每年就要12,000鎊，當中包括每周檢查、過濾及清潔費用等。
其實，亨利並唔係第一個喺屋企安裝巨型魚缸嘅球員，好似碧咸、艾利蘭同赫特等，都有喺屋企安裝大魚缸；不過規模好似亨利咁大，就肯定佢係第一個。據一名業界專家話：「我哋嘅顧客以男性為主，佢哋想要一啲有觀賞值價，又有身份地位象徵嘅嘢。」佢又講得冇錯，因為亨利呢個海洋龍宮，適合飼養2,000種魚，由觀賞魚到細種鯊魚都適合，啱晒養魚發燒友亨利。
不過，亨利呢個建議並唔係人人讚成，幫佢起家呢間屋嘅得獎建築師理查邁克麥爵士（SirRichardMacCormac），就認為亨利拆卸重建好唔環保：「我唔認為將一間僅13年樓齡嘅住宅拆卸，係長遠發展嘅做法；而且我覺得自己原本嘅設計，好符合該區嘅低調風格。相信佢突然間作咁大改動，好多人會不滿；再者，以一個咁有財力嘅人，點解唔諗吓興建一間新屋，而一定要拆咗舊嗰間呢？」