任賢齊月初因盲腸炎需即時入院做手術，只休息個多星期前晚即在紅館開騷又唱又跳，期間因大笑令傷口疼痛要出手按着，幸好有囝囝上台獻花，即刻冧晒。
一連兩場的「任賢齊神魔人世界巡迴演唱會」香港站，前晚在紅館開鑼，不少圈中好友捧場包括徐小鳳、關之琳、甄珍、金燕玲、梁錦松和老婆伏明霞等，小齊的女友Tina和仔女也在台下為他打氣。
陳昇扮林峯
小齊月初因盲腸炎要做手術，他只休息了個多星期即上台表演，不過見他精神奕奕還染了一頭銀白髮，甫出場更表演打鼓，又唱又跳，表現賣力，他笑說：「就算唱到傷口爆開都冇問題，唔使擔心我，我已經好番，又有咁靚嘅護士姑娘照顧我，我康復得好快。」
當晚小齊好友如魔幻力量、黃品源、陳昇和五月天上台擔任嘉賓，小齊的囝囝更上台獻花，他甫見囝囝即露出冧樣並搞笑說：「呢個小朋友好靚仔喎，你係邊家嘅小朋友呀？係呀，佢係我個仔。」小齊和黃品源合唱《那麼愛你為甚麼》後，小齊說：「我最記得做完手術後，護士成日問我放咗屁未，因為放屁即係排氣，排氣好重要，代表腸有郁動。」至於陳昇出場時則搞笑指自己扮「chok王」林峯，搞到得小齊和觀眾捧腹大笑，陳昇又取笑小齊幾乎笑到連腸都跑出來。
褲緊怕爆胎
安哥時，小齊又唱又跳《對面的女孩看過來》，跳完他卻一度按着肚子，小齊直言因為大笑令傷口有點隱隱作痛。之後五月天現身，小齊見到他們便笑言：「五月天好擔心我，怕我繼續唱落去個肚會唔舒服。」說完小齊彎身扮不適嚇觀眾。雖然做完手術不久，但小齊依然不斷走到台邊彎身收花，他又搞笑地指自己的褲太緊，擔心會「爆胎」，不過他隨即又指自己的內褲很靚，即使被觀眾見到也絕不失禮。
採訪：王連連 攝影：仇志德