星期日嘅英足盃16強，今季俾人話攻力疲弱嘅利物浦大開殺戒，主場大勝白禮頓6:1晉級，不過我求大俠睇真啲，原來紅軍嘅6個入波，有一半都唔係自己友入，而係烏龍嚟！
白禮頓嘅比列格係最黑仔嘅一個，包辦兩個烏龍，佢兩次都係俾個波近距離省埋嚟撞入，唔算犯錯，只係冇運；而佢隊友李維士鄧克就輸得肉酸少少，喺禁區入面想控定個波，點知心口一控，大脾一撞，踢埋入網！利物浦嘅另外3個入波分別由史卡迪爾、安祖卡路爾同蘇亞雷斯攻入，而白禮頓就靠卡辛加路亞罰球破蛋。
晉級8強後，利物浦唔算抽到好籤，將主場對史篤城，而淘汰阿仙奴嘅新特蘭就會惡鬥愛華頓。至於要同對手重賽嘅車路士同熱刺就抽到好籤，若果車仔晉級，會對英冠嘅李斯特城；如果熱刺重賽贏波，8強對手就係英超弱旅保頓。