泰國香港商會發通知，話泰國副總理兼財政部長KittirattNa-Ranong訪港，在二月十六日出席午餐會，叫會員捧場，左丁山是日本來約咗電腦J吃午飯，點知佢臨時唔得閒，早三日就取消約會，左丁山秘書好醒目，立即代報名出席泰國副總理午餐會，唉吔，左丁山記憶退化，以為當日冇約會㖭，着波鞋便服返工，點去見副總理呀。
冇法啦，硬着頭皮去到香格里拉，走入宴會廳，立即閃埋一張唔多人睇到嘅枱，立即坐低，唔起身去搵熟人打招呼咯。呢位副總理曾經係泰國國家足球隊領隊，泰國證券交易所總裁，估唔到講英文好流利，唔睇稿，冇PowerPoint，就講咗一個小時，題目係"Thailand'sEconomicEnhancingPoliciesaftertheFlood"。佢透露1997金融風暴之後，泰國有兩個經濟調查報告，分別建議泰國投資於水利建設，防範大水災，但泰國政府當時莫財，加上水災呢樣嘢，只係天氣報告靠估，發生嘅機率好難確證，於是政府將兩份報告束諸高閣。點知去年第四季真係發生咗嘞，令泰國GDP增長唔見咗接近4%，新政府痛定思痛，決定加緊興建水壩防洪防災，大舉投資於水利工程，亦同時催谷經濟沿着價值鏈向上移，避免與緬甸及越南作低成本競爭。
講就頭頭是道啦，做唔做得到要未來幾年睇過先知。原來呢個午餐會係德意志銀行搞嘅，德銀亞洲區嘅證券研究主管級人馬來香港參加投資研討會、講AccessThailand，泰國副總理兼財長為此到港一行，可見得「官商勾結」乃是各國經濟政策一部份，為咗外國投資，政府高層聯同商界一齊做大推銷員又何妨。香港一啲人鍾意將官商一致行動列為「官商勾結」，大駡特駡，未免天真一啲。奧巴馬外訪，最近加拿大總理訪華，習近平訪美，隨行團員最多人（二三百人）來自商界，國與國之間嘅交往最大目的，為咗做生意啫，講人權只係應酬語言，唔信就問吓加拿大總理。坐在左丁山旁邊嘅，係一間著名泰國證券公司研究部主管，美國人，二十一歲在摩根大通打工，調去曼谷之後就娶咗泰國女子，十七年來唔肯返美國。問佢曼谷邊間餐廳係佢首選，佢好爽快咁答：「Zanottiisthebest！」