【本報訊】一口痰，引發「烈婦」與食環大戰！52歲周女士友人咳嗽時不小心咳出痰，「斷正」遭食環署人員檢控，周婦忿忿不平在旁指天篤地臭罵對方，疑「辣㷫」一名男隊目，遭對方猛力拉扯阻止離開時，弄瘀左胸和手臂。她不滿食環署人員濫用暴力，向申訴專員公署投訴，揚言要追究到底。
記者：陳達浩、梁偉權、歐文瀚
上周日傍晚六時許，周女士相約友人科叔在上水智昌路街市附近購物，當時身體不適的科叔駕駛客貨車到來，並倚在窗邊咳嗽，其間不慎咳出一口痰。此時在對面馬路執勤的食環署職員隨即趕至，並當場作出票控。周女士認為食環署人員根本看不清楚，與對方高聲理論。
直認爆粗罵食環
「我話佢哋『咁衰，成日咁樣抄牌』、淨係識蝦老人家，最叻就係屈人！」義憤填胸的周女士承認臭罵內容夾雜粗口如「×家鏟」、「正仆街」等，「我講過唔怕認吖，『咁多人死又唔見佢死』之類囉，我鍾意指住個天鬧唔得咩？」
當時科叔已接受票控，但周女士不滿食環署人員拖延時間，半小時也不發告票，於是繼續「指桑罵槐」，終「辣㷫」一名男隊目，「佢話我講嘢大聲，要我收聲，『唔係就做埋你！』」其後對方聲稱已報警，阻止她離開。
「我轉身走，佢喺後面揑住我膊頭，喺胸口對上少少一下揸落嚟！」她形容男隊目相當用力，「我大嗌『放手，唔係我嗌非禮』，佢就話，如果我話非禮就做埋我！」其後一名食環女職員趕至喝止，隊目才改抓手臂。
警方到場後，周女士要求到醫院驗傷，診斷結果顯示她被揑位置出現瘀痕，可能傷及筋肉，左手因而變得無力，需服食止痛藥。當時一名劉姓北區總小販管理主任曾經向她道歉，並勸她「大事化小」，涉事隊目事後亦已作出道歉。
警署報案不受理
周女士不滿該隊目濫用暴力兼浪費警力，翌日到警署報案，卻不獲受理，最後向申訴專員公署投訴，第二次到警署報案方正式受理，她聲言：「我冇吐痰、唔係小販，又冇襲擊佢，我一定要抗爭到底！」食環署發言人回應稱，北區環境衞生辦事處的小販事務隊人員於執勤期間，目擊一名男子隨地吐痰，遂上前發出定額罰款通知書，其間一名自稱事主妻子的女子情緒激動，由於情況混亂，故要求警方協助，其後該女子表示身體不適要送院。警方仍在調查事件，不便評論。