這陣子鋪天蓋地都是由「唐室風暴」颳起的新聞和N次藝術創作，曾班子掛在口邊的創意工業終見萌芽，但想不到竟是應「唐」而生。不過縱然惡搞過癮，但食得多都係會滯。反而前幾日睇電視新聞另有瞄頭，因為見到一位認識的地產經紀上鏡，唔係講市而係糾眾尋釁。
公司爆發疑似工潮
事緣佢效力嗰間「美」資大行爆發疑似工潮，據之後了解（我冇話係佢講！），源頭係因為一名董事突遭撤職，於是聯同一批離職同事（佢亦冇話自己有份），叫埋傳媒去公司總部要求與主席會面，並列出一連串要求，首要梗係一眾復職！但我留意到佢哋要求基金經理全面徹查真相，嘩！嚇得我呀！話晒我間公司都一樣有為數不少嘅營銷人員，若然佢哋有樣學樣，我睇怕都唔使出嚟做IR（InvestorsRelationship）。
佢哋其中一個指控是老闆人工過高，係又點呀？就算要出聲都係股東嘅事，幾時輪到啲員工越俎代庖，你估我哋係立法會議員，始終都係用緊公帑出糧。況且市場經濟，從來都唔會係大鑊飯，分均難說。黃老雖然都係代理出身，但他貴為老闆，每個浪都不知淘汰幾多英雄，如果咁易做，就唔會剩下兩大，你估佢下面嗰啲出去戙旗開公司嘅人少咩？老闆要承擔經營風險，所以他的報酬有別可以理解，而作為一個行業的龍頭，表演優於其他，收穫自然是同步，這就是平等的機會，不等的結果。而黃老年收佔公司利潤11%，都算係比上不足，比下有餘。其實亦曾有基金經理質疑我呢個主席收入過……低，好似擔心我要秘撈咁！
無論是藝人或各行各業的乜乜天王，如果他失去市場號召力或份額，讓對手蠶食生意，此消彼長，他就應該減人工，甚至下堂求去。而且市場逆轉，為了持續競爭，裁人閉行只是順勢而行，佢又唔係做銀行，地產代理從來都預咗係潮來潮去。若然真係要問基金經理，佢都會話實話實說，寧可裁員，非必要亦不會輕言換主。何況最終公司表現不佳，或者管理層失職，通常亦不過係棄車保帥。
最後，就算是老闆的錯亦不過是自己的孽。據悉之前稱兄道弟，今日縱然閉翳，也是只怪當初。有創造力的其破壞力亦肯定有番咁上下。公司經營各司其職，身份不同無可能玩民主嗰套一人一票，總之老闆們受得起自作孽，先袋得住嗰份人工。
盧先亞