放洋留學後嘅葉劉淑儀，踢走掃把頭，銳意選特首，可惜中央唔會想多過兩個建制派候選人入場，令葉劉只能喺沙圈場邊來回踱步，有機會抽水攝吓位都好。
「唐宮風暴」爆發後，葉劉又熱爆，facebook俾市民洗板，係咁叫佢選特首。芸芸支持者中，竟然包括咗「愛上殺手」嘅男藝人麥浚龍Juno。Juno留言話：「可以嘅話，我想舉腳贊成！」睇嚟對葉劉情有獨鍾。
Juno出道時形象欠佳，成日俾觀眾柴台，幾經努力先至用歌藝打動人心，先苦後甜嘅遭遇，同當年因為推銷23條而遭全城唾罵嘅葉劉有啲似，唔通因為咁而對呢位悍將有共鳴而另眼相看？