歐豬債務危機，令環球股市舊年嚇到腳都軟埋，本港大孖沙身家冇緊截，鄰近嘅馬來西亞亦「同病相連」，有大馬雜誌公佈40大富豪總財產去年身家萎縮7%，糖王郭鶴年續膺首富，但身家就唔見咗8.6%。
首富地位不變
根據《大馬商業雜誌》啱啱公佈截至上月20日的40大富豪榜，以上市公司所擁有股份價值作計算，糖王郭鶴年成功衞冕大馬首富，身家達457億令吉（約1165億港元），不過同去年比，就跌咗110億港紙。排第二嘅印度裔富商阿南達身家雖下挫6%，達429.9億令吉（約1096億港元），但已經收窄同糖王嘅距離。
萬綠叢中一點紅係雲頂創辦人、已故丹斯里林梧桐嘅遺孀潘斯里李金花重回富豪榜，以65.8億令吉（約168億港元）打入第8名，係唯一一位打入20大首富的女富豪。雜誌指出，雖然去年大部份富豪身家都縮咗水，但達10億令吉富豪數目有所增加，增3名至30人。