距離港股第二階段延長交易時間仲有兩個禮拜，港交所（388）啱啱喺上周六（18日）為市場提供一次做模擬加時交易嘅機會，呢次係自願參與性質，畀經紀同資訊供應商試行一次，聽講過程都幾順利。連模擬交易都做埋，3月5日加時似乎都冇彎轉。
雖然係咁，但香港證券及期貨從業員工會計劃盡最後一分力，28號再發動一次業界遊行。會長林德明話，今次遊行個名堂係「業界團結大遊行」，除咗呼籲從業員同飲食界，亦會邀請本地七大證券業組織參與，至今起碼有三個組織應承出席支持。
打定輸數叫外賣
點解揀28號咁近加時嘅日子呢？據林會長解釋，今個月初同港交所CEO李小加會面時，對方講得好清楚話時間咁緊迫，好難改變3月5日開始加時嘅事實，但佢會喺29日嘅董事會上面，再同主席夏佳理反映。工會於是希望喺港交所董事會開會前一日再畀啲壓力佢哋，希望可以令佢哋收回成命。
唉！華華認為工會的確用心良苦，只可惜夏佳理同大部份港交所董事都贊成加時，有啲經紀都打定輸數，早啲諗定到時叫邊間外賣。