足球遊戲一向以《Winning》同《FIFA》獨佔江山，家用機上《FIFA》更逐漸爬頭做一哥。今次《FIFA》率先搶佔PSVita，新加入手指射門創新玩法，為操控悶到爆嘅足球遊戲帶來新衝擊！仲有媲美家用機嘅畫質同流暢度、以及隨時上網激戰嘅爽快，《FIFA》呢鋪又贏漂亮一仗。
記者：韓繼聰
攝影：伍慶泉
Model：Paris@InterplayWorkshop
遊戲提供：I-Gamer（27253338）
前傳後射 激新手感
玩慣《FIFA》呢類足球Game嘅都知，咁多年嚟操作上都無大改動，嚟嚟去去都係方向掣加短傳長傳同射門，雖然年年出新版，但恰埋眼都知點玩。今次嚟到新平台PSV，《FIFA》又點會放過佢個前後觸屏？於是就加入「前傳後射」新操控法，大大增加遊戲新鮮感！前傳者，當然就係用前觸屏控制傳球嘅路線同力度，長傳、短傳定直線，都靠晒隻手指。以前玩《FIFA》，無論幾熟手，十次總有一兩次傳錯方向，錯失大好機會，家用手指就直接得多，而且感應相當好，用幾次基本上已經上晒手，傳得勁爽！射波就更過癮，用後觸屏控制角度同力量，射唔射得出世界波就睇你「指功」有幾強喇！感覺新穎之餘，射門感覺亦更直接真實，勁射、笠射、「啅」角，全憑手指直覺反應，真實感大增。聽起嚟，又前又後好似好複雜咁，但其實只要花幾場波熟習，已經可以得心應手，好過咁多年都係㩒掣咁鬼悶吖。
網上隨時開波
講完新操作，另一個「正點」當然就係佢嘅網上對戰功能。除咗完全繼承家用版「HeadtoHead」模式，PSV版亦提供上網單挑玩法，甚至湊夠人打「11Vs11」一樣得，試問有咩爽得過可以隨時隨地同世界各地高手組隊切磋？畫面方面，《FIFA》亦係頂級水準，球員的面貌和動態都相當理想，整體畫質完全媲美家用機級數，實在相當驚喜。
畫靚之餘，流暢度亦高，即使多人處於同一畫面，亦唔覺有PSP時代嘅窒機情況，加上家用版上嘅碰撞物理引擎、各種遊戲模式、以及《FIFA》引以自豪嘅超齊全官方球員球隊資料，都差不多完整移植到PSV上，絕對有家用機帶出街玩嘅感覺。
《EASport：FIFAFootball》
機種：PSVita
類型：運動
人數：1人（支援網戰）
售價：$320（下載版相同）
