A字膊特首候選人唐英年被踢爆在九龍塘寓所僭建地下皇宮，前日更將責任全卸落太太郭妤淺身上，其賣妻求榮做法惹來全城娛圈女將狂插。身為人妻的林嘉欣昨指髮型屋阿嬸也斥唐唐「醜死怪」，而貌似唐太郭妤淺的阮小儀則感嘆說：「比人感覺係扣分嘅！」
唐英年繼被踢爆有婚外情後硬拖太太出來做大龍鳳後，日前又被踢爆九龍塘約道寓所僭建地下皇宮，更將所有責任全數推落枕邊人郭妤淺身上，要太太在傳媒面前哭着道歉求饒。唐唐身為男人既冇膊頭又冇腰骨，更令娛圈女將戥唐太不值。
嘉欣：戥佢老婆心酸
林嘉欣昨出席青衣代言護膚品活動，對唐唐賣妻求榮一事，嘉欣說：「我噚日喺salon聽到啲阿嬸講，話佢醜死怪，阿嬸係代表普羅大眾。」可覺得做人太太甚艱難？嘉欣說：「當然！作為有影響力嘅人，喺背後支持嘅人好重要，我喺電台聽到佢老婆咁講，都戥佢老婆心酸。喺政治上，有太多不同方法去解決，呢個（推落太太身上）係其中一個。」
被指貌似唐太的阮小儀，昨日在電話中說：「佢老婆肯企出嚟講都幾偉大。」唐唐如此冇承擔是否還適合做特首？小儀說：「畀人感覺係扣分嘅，惟有做多啲嘢努力番。」汪明荃（阿姐）現為全國政協，前晚她出席九龍灣展貿舉行的IFPI頒獎禮，被問到唐英年賣妻求榮一事時，她顯得有點避忌說：「冇仔細睇，總之對人要有誠信，普通人都要有，言行舉止要自律謹慎。」昨日阿姐接受商台訪問時表示，有勇氣才可選特首，做特首是需要承擔，阿姐說：「事實係事實，佢要面對，不過佢危機處理係慢，應該一家之主承擔，男承擔好啲，唐太好勇敢，值得尊重。」
徐淑敏：男人要承擔
容祖兒說：「要做一個榜樣先可以令人服佢，如果想成為香港leader就要做呢樣嘢，總之佢太太好偉大。」蔡卓妍覺得唐唐應交代事件，她說：「我覺得誠信好緊要，佢要好好交代畀香港人，家唔只係屋企嘅問題，佢係特首候選人，所以應該交代畀全香港。」
身為人妻的袁詠儀，前晚到香港大學出席「活出真我分享會」後，忍不住在微博鬧爆唐唐說：「婚外情和僭建的醜聞都一一讓太太去承擔、去受忍辱！倒不如，你讓她去選特首吧！她肯定是一個會承擔、香港巿民怎麼罵都能忍辱負重的女人！」
徐淑敏對唐太食死貓也深表同情，她昨日在電話中說：「我覺得男人要有承擔，就算成件事太太有失誤，做老公嘅身為一家之主，佢乜都要攬上身，點都要保護成家人，保住個屋企。」黎淑賢昨日謂：「儒家思想係修身齊家治國平天下，自己屋企都未搞好，不如搞掂先出嚟參選，我反而支持唐太代夫出嚟參選，遇到個老公唔肯承擔，做女人嘅惟有自己啃。唐生成日都用感情缺失做藉口，將來選咗佢做首，又係咪遇到乜嘢問題都話感情缺失吖？連細路仔都識知錯能改，佢咁樣只會不進則退。」
白姐姐：唐唐做得差
李司棋昨出席藍田舉行的優質正印活動，對硬食死貓的唐太，司棋姐同情說：「早啲承認好啲，因為佢一路都冇認過，變到大家逼到盡。」卓韻芝也寸爆唐氏夫婦說：「唐太幫老公孭鑊，佢好有中國女性含忍態度，又打理屋企咁好，尤其興建地牢咁大個project都搞掂，相信唐太上陣管理香港，巿民一定有運行。」
身為區議員的白韻琹對唐唐事件也非常反感，她說：「我覺得唐英年同老婆係天生一對，唐唐嘅公關做得好差，炒得兼各打30大板。唐唐唔應該推卸畀老婆，換轉唐太應先企出嚟自首就高招，佢可以話係起間驚世天堂困住老公，防止佢出去滾。」
採訪：林嘉慈、張俊銘、比華利
攝影：黃偉雄、陳慧安