拍劇多年的佘詩曼飾演過不同角色，但不少觀眾認為，阿佘交到戚其義的手上，一定會有驚喜，阿佘聞言後笑說：「基本上喺阿戚手上嘅演員，佢盡量都唔會重複形象，最好係將你成個人反轉晒，所以拍佢嘅戲係會上癮，因為永遠唔知佢下一次又會玩啲乜。」
拍喜劇冇包袱
笑指阿佘拍完《天與地》後，相信已沒有難事，阿佘說：「所以拍得好舒服好輕鬆，我第一次開阿戚嘅戲，可以係冇包袱、冇負擔，個心唔使乸住乸住，可能係愛情故事，加上同《天與地》唔同劇種，不過都要留心睇。」陳豪也深表認同，他笑說：「阿戚今次將佢（阿佘）變化好大，喺戲入面阿佘有好多個造型，最靚都係今次。」
阿佘提到這些百變造型，忍不住大吐苦水說：「最尾嗰日開工真係想死，因為故事講我拍過好多戲，所以每個造型嘅戲都要拍少少，結果我喺一日之內，要拍古裝、武打兼吊威吔，跟住又要我跳印度舞兼咪嘴唱印度歌，臨尾仲要扮貓女，喺巴士頂直插落地擺埋甫士，我已經冇晒力，腳軟又好驚，嗰刻真係想退出娛樂圈。」幸好出來效果不俗，阿佘覺得辛苦也是值得。
喜吸引新觀眾
《4InLove》和《天與地》風格截然不同，問二人會否覺得《天》劇打開了另一個觀眾層面？他們說：「大家都冇預期《天與地》嘅成功，冇諗過做啲乜嘢去維繫某班人，其實只要你睇番之前嘅《火舞黃沙》，你會發覺我哋一路嘅方法都冇變，只係今次吸引到一班唔鍾意睇電視嘅人開始注意，不過發掘咗一班新觀眾梗係開心。」