達成集團（126）上個星期，鑊氣開始滲住滲住嚟，交投見異動，有買趁手。達成仲喺三年低位橫行，NAV折讓已經高達76%，仲想佢跌得去邊？又達成呢幾年除咗係祖國益陽市房產項目增值中獲利，集團又新拓展連雲港「華東城」。看官不妨以華南城（1668）做個參考，隨住達成栽培，等項目有番咁上下利潤，一樣有好似華南城嘅分拆上市機會，達成肥仔水。再講，達成旗下「佳寧娜」品牌飲食業，亦都搞得有聲有色，呢瓣製作，又有冇機會喺資本市場，進一步反映身價呢？係咁意將達成每股NAV2.76元，冧多20%到3.3元，折讓上到八成樓上，嘩，吸引到爆。唔好計多，達成折讓收窄到70%，現價（0.63元）已經講緊翻半番。
莊中現金牛殘到爆
莊士中國（298）手頭淨現金，講緊係淨現金，有8億銀，即係相當於每股0.53元。莊中現價幾多？係0.425元。又莊中NAV1.6元，折讓高達73%。現價都未嚟得切反映淨現金值，莫講話其他資產部份，莊中股價殘到爆。博莊中呢轉升番上每股淨現金值，現價要升近25%。到時，集團嘅折讓，仍然高達67%。
錢雋