從不知，玩頂級音響，竟像跟初相識嘅女朋友拍拖，若操之過急，就「嗒」唔出真正味道！來自法國知名品牌audioaero，最新旗艦LASOURCE，唔止用上極級SACD/CD唱盤，金屬機箱入面仲內置前級膽機功能，現場慢火「煲滾」約一粒鐘後細味，立即Feel到呢一股法式浪漫。
記者：陳國輝
攝影：潘志恒
Model：Fiona@Zmodel
日製超頂級SACD唱盤
叫得做「女友」，梗係有引人入勝之處！同一般音樂播放器相比，LASOURCE外殼採用鋁合金物料製成，手感冷冰冰，再加上頂部經人工打造出一條條細緻坑紋，認真程度可想而知。
睇見唱盤部份與兩側按鍵形成凸出之勢，原來別出心裁。據影音專家阿Ken話，呢條疑似「S」形嘅線條，喺法國係代表Lucky，亦即「幸運」嘅意思，屬於一種祝福；若然唔熟悉法國文化又去擁有LASOURCE，嚴重程度相當於不尊重呢名法國女友。當然，令到發燒友如此心跳加速，呢個SACD/CD唱盤一定魅力不凡。唔講又唔知，佢其實用咗知名日本品牌Esoteric嘅頂級轉盤VRDS-NEO/VMK5，呢款轉盤係Esoteric對外銷售嘅最高級型號，特別針對SACD而設，可以喺SACD高速旋轉下確保光碟穩定性，大幅降低旋轉噪音，提升音色還原度。而佢唯一缺點，在於一個「貴」字，幾十萬一部Player，自問就高攀不起了。
配Philips真空管當前級
講到姿色，LASOURCE又點只係一般SACD/CD咁簡單。機箱入面，已擁有兩支PhilipsW6021真空管，可獨立作為一部前級膽機，適合品嚐清脆嘅人聲！另再透過機背端子，便可接駁並推動後級，發揮出專業前級機嘅功效。
除咗玩懷舊，LASOURCE亦不忘添置最流行嘅數碼裝備，然而最受近期發燒友熱捧，就要講到數碼音樂解碼（DAC）！最近，市面上已流行可獨立購買嘅DAC裝置，售價只係講緊兩、三千蚊；不過LASOURCE特別好多，佢提供埋USBDAC插，只要駁上電腦，就可以為數碼樂曲進行解碼，而取樣率、音色甚至比CD仲要靚。
試聽發燒碟
現場以麥景圖前後級，再配合VOCAL頂級喇叭嚟測試LASOURCE的表現。播JAZZ嗰陣，清晰程度就連吹色士風中間唞氣位也一清二楚；而另一張聽人聲嘅專輯，也感受到膽機嗰份暖和表現，正！
audioaeroLASOURCE
唱盤：SACD/CD
轉盤：日本EsotericVRDS-NEO/VMK5
處理器：32bit/384kHz
外框：50mm厚鋁合金殼、底部三隻防震腳
端子：USB、數碼/模擬輸入
重量：15kg
特別功能：模擬前級放大器、內置DualMonoDAC
查詢：Richcom（23140811）
同場加映
Klipsch鑑聽級耳筒
除咗大型發燒音響，年輕人當然也喜愛隨身音樂裝置。想揀一款鑑聽級質素耳筒，不妨考慮美國牌子Klipsch。頭戴式ReferenceOne採用Klipsch喇叭嘅Reference系列調音技術，分析力特別強，佢仲支援iPhone/iPod免提功能，講電話都得；而入耳式ReferenceS4i，功能相若，除了體積細，佢仲具備不俗隔音能力。
