隨住科技進步，觀眾要求越來越高，睇戲睇波乜都話要3D，貪有層次感喎！無綫徇眾要求，都特登整番套3D高清劇出嚟益大家，勁在呢套唔使後期製作、觀眾唔使戴乜嘢3D眼鏡，都照樣睇到立體效果。呢套全港首齣3D劇，咪就係楊怡擔正嘅《OnCall36小時》囉！
套劇圍繞醫護人員，不過唔使驚，3D嘅並唔係血淋淋嘅五臟六腑，亦唔係磨刀霍霍嘅手術刀，而係楊怡個木偶鼻嘅大特寫啫。眾所周知楊怡個鼻近年越變越尖，呢套《OnCall36小時》直情不得了，
極有壓迫感
只要鏡頭zoom近少少，佢個鼻就好似插穿電視機螢幕，側面睇仲誇張，直情有種壓迫感。
羅馬非一天建造，唐宮唔係07年動工，咁楊怡個鼻呢？查實有煲開深宵劇嘅讀者，都應該見證過佢嘅蛻變。好似上年重播05年嘅《學警雄心》，楊怡個鼻同我哋一樣㗎；之後重播07年嘅《學警出更》，已經發現有少少唔同；再睇埋呢套「3D劇」，直頭係完成品啦！