特區選戰風雲，賣妻求榮呢一幕，好睇過公仔箱人食人嘅《天與地》。選戰由最初豬狼對決，發展到A膊賤男唐唐嘅垂死掙扎內心戲，噚日又上演葉劉、曾鈺成群鬼搶閘嘅大場面，真係日日新鮮日日新！
但八方數嚟數去，好似仲欠一個主角未出場，咪就係全國人大常委范徐麗泰囉。呢幾日都冇見佢露面。八方收到風，原來范太家身在亞太區其中一艘最豪華嘅郵輪皇家加勒比郵輪鑽石公主號，遊走台灣、日本、韓國，玩到月底，最後一站在天津上岸，之後再到北京。吓！北京，你話好戲係咪在後頭，你哋係香港爭餐死，范太就坐郵輪到北京「泊個好碼頭」。
嘆世界玩足11日
老友同八方講，范太近日好鬼忙，前幾日去咗海南島開會，周四先返港，見到特首選戰七國咁亂都冇理會，快手執行李，噚日隨即上鑽石公主號嘆世界，玩足11日。
有郵輪公司高層同八方講，呢艘鑽石公主號唔簡單，係亞太區其中一部最大郵輪，排水量成116,000噸，全長290.4公尺，總共有18層樓，巴閉過唐宅地下皇宮多多聲。船上有餐廳、劇院、賭場、夜總會、酒吧、泳池、SPA、健身房，甚至高爾夫球練習場等，玩樂設施應有盡有。
由香港玩到上北京
老友又話，今趟行程仲係香港做第一站上船，十分少見。之後經台北、日本長崎、南韓、上海、大連、天津，最後到北京，「呢條線行程一般七、八日，呢個團長到11日，都幾少見。每泊一個碼頭，啲客都可以上船參觀」。團費由1.1萬到2萬不等，視乎瞓乜艙位。
話時話，呢次郵輪行程好似為范太度身訂做，玩到天津上岸，再玩埋北京尾站，范太就留京開大常委會例會，之後就開兩會。范太迂迴上京有乜收穫，真係令人期待，總之選戰風雲好戲連場，未到最後一刻，都唔知結局。
mailto:[email protected]