網民謬思、特首候選人唐英年，為激發港人創意，例必身先士卒放笑料，給網民大量靈感改圖。今次僭建風波引發史無前例的極速改圖潮，唐唐一天變成幾十套電影的主角，且戲路甚廣，無論是嚴肅政治、愛情小品、抑或是三級艷情，他都有粉墨登場！撰文：蘇芬妮
動作片：《別問》
錄音機唐唐最怕答問題，因為一問就露底，當然想大家「別問」。但原來佢最叻耍詠春，一個黐手推晒啲責任畀老婆。
政治片：《損戰風雲》
雙英交手，好睇過首輪影片，龍豬民意被狼馬極速超前，但他面不改容賣妻求榮，政治世界果然污穢。
青春片：《那些年，我們一起僭建的地下皇宮》
僭建風波越爆越大，網民思疑唐唐和唐太有份監工的地庫在那些年動工。唐宮家有得睇冇得用，人生果然很多事都是徒勞無功啊！
科幻片：《變形金剛之大黃蜂深入豬竇》
平日寧靜的約道日前出現驚天巨變，光天化日圍豬時，一班記者為民除害，唔使用吊臂，叫大黃蜂出來就得啦！
三級片：《唐宮》
起安樂窩，點解唔向上發展呢？要收埋喺地底，令人想起古代暴君收埋三千佳麗的後宮，有紅酒有靚女，你睇唐唐幾得戚？
愛情片：《約道七號》
經歷婚姻低潮的唐生唐太拍愛情片，有冇票房保證㗎？不過佢哋的確喺約道七號發生過可歌可泣的愛情故事，可惜係悲劇。
搞笑片：《唐伯父點收科》
「別人笑我太瘋癲，我笑他人看不穿」，伯父之齡嘅唐唐先搞出「課外活動」同僭建醜聞，仲拉老婆謝罪，今次真係唔知點收科。
恐怖片：《恐懼鬥室VI之人面獸心》
唐宮僭建二千幾呎，竟然恐怖到用嚟放雜物（如紅酒）。大把港人冇樓揸手，仲有十萬人住劏房，想做特首嘅唐唐諗緊乜？
特技片：《地心冒險2》
唐宮地下皇宮咁大，有電影放映室、品酒室、健身室，成個主題公園咁款，之不過閒人免進，唔畀記者入去冒險啫！
魔幻片：《哈利波特之消失的地下室》
唐唐之前口窒窒唔認起地庫，想瞞天過海，網民競猜地下室要用幾多水泥先可以一晚填平？唐唐唔搵哈利波特幫手都唔得啦！
古裝片：《唐門女將之豬令如山》
唐太兩次巾幗出征，企圖幫唐唐化解政治危機，可惜唐門豬令如山，背後班公關又冇用，烈女壯烈犧牲嘅場面都變笑片。
