怪事年年有，今年特別多。唐英年以為坐定粒六等做特首，點知唐宮事件，誠信一鋪清袋，賤男之名點洗都洗唔甩。截稿之日，葉劉及曾鈺成齊表態可能參選，唐唐特首之路殊不樂觀，由周初被爆大鑊，到死口唔認到拉埋老婆落水，起承轉合，都配合得天衣無縫，真係好睇過戲，連對政治冷感的股榮亦一路追一路媽。
按照劇情發展，跟住的特首選舉戰將高潮迭起。相信大家近排可能多咗買報紙，睇電視的觀眾亦可能會轉睇新聞台，距離投票日尚有一個多月，筆者覺得發霉咗好耐嘅傳媒股，有翻身機會。
先旨聲明，傳媒報業股，易買難走，亦唔係所有都可以炒得起。《明報》周初先踢爆僭建，但其母公司華文媒體（685）股價周內倒跌收場，有兩個原因：一是貨疏根本無人炒；二是缺乏視感效果，純文字齋圖片，起初的確會引起注意，但並不直接，反而有片有聲，讀者或觀眾投入感會大增，超人天宇海事件就是最好例子。
小明由五樓跳樓唔死的笑話，成為前周全城熱話。長實馬鞍山樓盤天宇海，五樓平台花園原來係地下，一至四樓消失了，無綫記者喺街邊伸手，已經可以敲到睡房窗，事件引來極大迴響。當大部份人以為TVB威番次，事件原來先由《壹週刊》於1月中旬已揭發，無綫能食水尾，關鍵在於有片喺手，令大家更能投入苦主角色。
媒體應引入新收費模式
有上市的三間電子傳媒，上周股價分別升1.9%至8%，反觀報紙傳媒，卻只有兩間有拍片的報紙集團能錄得正回報，其餘三間則跑輸大市。最巧合是，一直護唐的報紙集團，喺上周二僭建事件發酵後，股價一直走低，上周三晚唐宮圖則曝光、上周四公開認錯，股價於上周四及上周五分別跌1.5%及2.3%，不過成交不大，可能係有股東心急套現割愛。
據了解，報販協會建議報紙加價1蚊，我相信對銷量影響輕微，坊間免費報紙氾濫，肯付出6蚊的市民，並不會因加1蚊拒買，正如唔買報紙嘅市民，除非見到大單新聞，否則即使如去年有報紙平1蚊，亦不為所動。
報紙現時面對的挑戰，是互聯網資訊太快太多且免費，年輕一輩手握iPhone，已能接收即時訊息，外國報章雜誌如FT及經濟學人已實行網上收費模式，結果讀者不減反增，除倚靠廣告，如何將收費模式引入香港，相信是傳媒股翻身關鍵。
股榮