肥仔Ｋ係標準NBA球迷，對一眾球星及球隊瞭如指掌，但佢打從到美國留學開始，唔知點解，係要捧一啲贏唔到冠軍嘅球隊，就像金州勇士、猶他爵士與紐約尼克，爵士有史托頓、馬龍之時，叫做戰績唔錯，勇士與尼克呢十年來就令擁躉傷心到極，問過肥仔Ｋ：「喂，你在UCLA讀書，點解唔捧湖人隊？」佢嘅答案就係：「我鍾意啲underdogs！」冇計啦，睇波傷心足足十三年，係佢自己揀嘅。
點知有一位阿Lin橫空出現，似係籃球天神轉世，憑一個偶然機會，有得出場十幾二十分鐘，佢牢牢把握到，咁就創造咗歷史，寫稿時紐約擊敗帝王隊取得七連勝，神話繼續，連到白宮發言人都對記者證實，奧巴馬在「空中一號」睇阿Lin對多倫多速龍，射入三分球贏波，奧巴馬猛話阿Lin嘅故事十分勵志感人。
哈佛噃、華裔噃、紐約噃、NBA球星噃，你估嘢少乎，啱啱電視台播出一段大概係某台灣電視台（唔識得名字）唔知幾時訪問林書豪母子嘅訪問片段，林書豪話：「我中學成日掛住打籃球之時，好多媽咪嘅朋友勸佢唔好俾個仔浪費時間，要畀啲心機讀書。點知我入咗哈佛，佢啲朋友又圍住媽咪問：打乜嘢波先至可以入到哈佛？」佢畢業後參加新秀選拔，冇人要，後來卒之俾勇士隊選中，興奮莫名，最後又係被炒，去年夏季佢到侯斯頓試工，到教練奇士笑佢：「喂，你係哈佛榮譽畢業生，入NBA做乜？」卒之又係炒咗佢，呢位奇士先生就係家速龍隊嘅教練。
為咗阿Lin，肥仔Ｋ立即付錢買網上NBA及iPhoneNBA之電視播映apps，原來要千三蚊，夠晒大手筆，發夢佢擁護嘅紐約隊今季可以打入季後賽，阿Lin可以與波士頓朗度、芝加哥羅斯、熱火韋特呢三大名衞硬碰硬，確認佢一流控球後衞嘅地位，肥仔Ｋ話諗吓都興奮。哈佛大學都興奮噃，cnnsi網站一位作者話哈佛大學自1954年以後，產生第二位NBA球員，難得之至。數吓手指，自1954年以來，白宮主人有三位哈佛校友，即係甘迺迪、小布殊（MBA）、奧巴馬（J.D.），今年競選大概又係哈佛對哈佛，由奧巴馬大戰羅姆尼（哈佛MBA,J.D.），哈佛畢業生做美國總統嘅機會高於做NBA球星嘅機會，難怪奧巴馬呢位籃球迷亦都追住睇佢嘅校友。